Цаһан Cаран Әәдрхнд темдглв

Сегодня, 13:36 | Общество, Таңһчин зәңгс, Зіњг, Сойл

Цаһан Сарин байриг бидн сара хонгтан темдглҗ, нег-негндән золһҗ однавидн. Мана таңһчла хам-хоша бәәдг Әәдрхнә мүҗлә бидн бат залһлда бәрҗ, сойлын халхар хамдан олн зүсн керг-үүлдвр давулнавидн. Шидр Хальмг Таңһчин Толһачин даалһврар Хальмг Таңһчин Улсин Хуралын (Парламентин) Ахлач Артем Михайлов Әәдрхн балһснд болсн Цаһан Сарин байрт орлцв.
Хальмг Таңһчин Улсин Хуралын (Парламентин) Ахлач Артем Михайлов, Әәдрхнә мүҗин Хүүвин Ахлач Игорь Мартынов, Әәдрхнә мүҗин губернаторин һардврин һардачин негдгч дарук Кирилл Каюков, таңһчин Улсин Хуралд Хальмг Таңһчин Толһачин элч Манҗин Араш, «Хальмг» гидг хальмг улсин сойлын олна ниицәнә ахлач Эльдән Николай Әәдрхнә шаңһа филармоньд болсн байрин концертд орлцв.
- Әрәсән Президент Владимир Путинә шиидврәр мана орн-нутгт улсин ниицлтин Җил зарлгдв. Иим керг-үүлдврмүд келн-улсин сойл делгрүллһнд, олн зүсн-шаҗнд иткдг әмтнә хоорнд иньгллтин залһлда батруллһнд, цуһар хоорндан ниитә бәәхд туслна. Иим харһлтс нег-негнәннь сойлла, авъясла таньлдҗ, мана орн-нутгт олн келн-улс ни-негн бәәхиг медүлҗ орн-нутгиг батрулна, - гиҗ Артем Васильевич йөрәлин үгдән келв.
Цаһан Сарин байрин керг-үүлдвр бүрдәсн «Хальмг» гидг хальмг улсин сойлын олна ниицән Әәдрхнә мүҗд бәәдг хальмгудыг хамцулҗ, хойр региона иньгллтиг батруллһна кергт ик тәвцән орулҗана. Ахлач Артем Михайлов олна ниицәнә шунмһа гешүдт зака үүдәгч Хургин Ханлтын бичгүд бәрүлҗ өгв.
Байрин концертд Хальмг Таңһчин «Бамб цецг» болн Әәдрхнә ду-бииһин ансамбльмудын артистнр билг-эрдмән үзүлҗ, хальмг болн орс сойлла таньлдулв. Филармоньд ирсн гиичнрин оньгт соньн һәәхүлмүд тусхагдв. Лиманск района хальмг сойлын «Герл» клубин гешүд, Н.К.Крупскаян нертә дегтрин саңгин болн улсин сойлын номин-методическ төвин көдләчнр эн һәәхүлиг бүрдәҗ, Цаһан Сарин байрин тускар олнд медүлв. Тер мет хальмг урчнр олн зүсн ке-сәәхн наадһас келһнә болн хатхмр хатхлһна дамшлтарн хувалцв. Т.Милованован һардврт үүлддг ке хувцна театрин күүкд сәәхн хальмг бүшмүд өмсәд, байрин бәәдл тогтав.
Концертин хөөн күндтә гиичнр Әәдрхн балһснд босхгдҗадг бурхн-шаҗна төв хәләв. Нидн намрар энд «Хальмг» гидг хальмг улсин сойлын олна ниицәнә седвәрәр болн Хальмг Таңһчин Толһачин дөңгәр Бодь Суврһн босхгдла. Олна ниицәнә гешүдин келсәр, өөрхн иргчдән энд хурл босхх, сойлын-гегәрлтин төв тосхх зура бәәнә.

БАТАН Наталья

Видео