Олна бүрдәцсин үүлдвринь шунмһадулҗ

Сегодня, 12:46 | Общество, Таңһчин зәңгс, Зіњг, Сурєуль-эрдм

Одахн Элстд, бичкдүдин үүдәлтин бәәшңд «Навигаторы детства» гидг орн-нутгин төсвд орлцҗадг олна бүрдәцсин болн җисәдин таңһчин хург болв. Дунд сурһульмудын һардачнрин селвгчнр, багшнр болн «Орлята России», «Движение первых» җисәдин шунлтта элчнр – Элстин сурһульмудын эклц болн ах классин сурһульчнр, нам 27-ч тойгта «Теремок» садын бичкдүд, олна бүрдәцсин элчнр болн эк-эцкнр энүнд орлцв. Эдн цугтан тәәз деер һарад Әрәсән болн Хальмг Таңһчин частрмуд орс болн хальмг келәр дуулв. Әрәсән келн-улсин ниицлтин җилд хург нерәдгдв.

Тиигҗ эдн сурһмҗин көдлмшт орлцдг цуг улсин хамцлтыг чаңһаҗ таңһчд бәәдг келн-улсин иньгллтиг цааранднь батрулх күсл тәвҗәнә. Сүүрт «Навигаторы детства» орн-нутгин төсвин таңһчин зүүцүләч Сараңкан Екатерина эднә күцәҗәх сурһмҗин көдлмшин тускар келҗ өгв. «Бидн хамцу үүлдвр күцәҗ, хоорндан күүндвр кеҗ дамшлтарн хувалцнавидн, терүнә йовудт шин кергүдин туск кесг санан үүдв, тедниг ода тохрах кергтә. Багшнрин, сурһульчнрин болн эк-эцкнрин нилчәр «Навигаторы детства» төсвин улд сурһмҗин баг бүрдәгдҗәнә, – гиҗ Екатерина Эрдниевна темдглв.
Тер мет таңһчин «Медрл» ниицәнә һардач Манҗин Элеонора сүүрт үг келҗ бас селвгән өгв. «Эн керг-үүлдвр Әрәсән улсин ниицлтин җилд нерәдгдв. Чинртә кесг зурас хургин йовудт үүдәгдв. Тедниг бәәдл-җирһлд тохралһнд мана ниицән бас дөңгән күргәд бәәх. Ниицәнә хойр илдкләч сессин болн терүнә талвңгин көдлмшт орлцҗ селвгчнрлә болн багшнрла дамшлтарн хувалцҗ, сурһмҗин көдлмш күцәлһнә халхар селвгән өгв. Хамцу күчн-чидләр олна бүрдәцсин үүлдвр «Навигаторы детства» төсвәр дамҗад эрк биш күцәмҗтә болх», – гиҗ Элеонора Сангаджиевна тоолвран келв.
Деер келсәр, сессин йовудт дорас өсч йовдг үйнрт сән сурһмҗ өглһнә кесг төрәр талвңгуд көдлв. Тер тоод бичкдүд болн баһчуд дунд терроризмин хәләциг тархалһнд бат хаац тәвлһнә тускар «төгрг ширән» сүүрт тодрха күүндвр болв. Зөв-йос харлһна, сурһуль-эрдмин, номин болн мана таңһчин бурхн-шаҗна бүрдәцсин элчнр эн күүндврт орлцв. Терроризмәс, әәмшгтә йовдлас гетлһнә көдлмшиг дигтә-даратаһар бүрдәҗ, баһчудт тиим йовдл бурушадг хәләц сурһмҗлх кергтә гиҗ күүндврт орлцачнр темдглв.
Хальмг кел тархалһна тускар нег талвңд бас өргн күүндвр болв. Эндрк өдрин шин эв-арһс тер кергт туслад бәәх гиҗ орлцачнр тоолвран келв. Тооһин көрңгиг, сурһуль-эрдмин төсвиг, үүдәлтин эв-арһиг төрскн кел тархахин төлә улм өргнәр олзлх кергтә гиҗ багшнр селвгән өгв.
Тиигҗ сессьт орлцачнр көдлмшән хамцулҗ, улм ик зурасан тохрахар белдҗәнә.

ҖААХАН Бадм

Видео