Таңһчин делгрлтин төрмүд хәләв

Сегодня, 13:18 | Общество, Таңһчин зәңгс, Зіњг, Сурєуль-эрдм

Давсн сарң өдрлә Хальмг Таңһчд «Негдсн Әрәсә» партин тооцана-көтлврин ик хург болв. «Аш бәәнә» гисн дуудвртаһар цуг орн-нутгар эн болҗана. Ик хургт күцәгч болн зака үүдәгч, олна бүрдәцсин элчнр орлцв. «Негдсн Әрәсә» партин улсин көтлвриг тавн җилин эргцд тохралһна ашиг ик хургт орлцачнр диглв. Тер көтлврәр түшг кеһәд парть 2021 җилд Орн-нутгин Хүүвд болсн суңһврт диилвр бәрлә.
Тер мет Хальмг Таңһчин иргч делгрлтин һоллгч зөрүллтиг йилһҗ авх төр тәвгдв. Ик хургин һоллгч сүүрин өмн кесг салврин делгрлтд нерәдсн күүндвр тавн талвңд болв. Партин улсин көтлврин һоллгч зөрүллтнь сурһуль-эрдмин салврин өргҗүллһн болҗана. Элстин бичкдүдин үүдәлтин бәәшңд болсн харһлтд эн халхар ямаран көдлмш күцәгдснә, иргчдән улсин көтлврин ханьд ямаран һол күсл тәвгдхин тускар багшнр, сурһульмудын һардачнр болн шинҗләчнр тоолврарн хувалцв. Күүндвриг таңһчин сурһуль-эрдмин болн номин министр Александр Ким, «Медрл» ниицәнә таңһчд үүлддг әңгин һардач Манҗин Элеонора болн Хальмг ик сурһулин багшин дацңгин һардач Очра Ирина һардв.
Күүндврин өмн таңһчин Улсин Хуралын (Парламентин) Ахлач Артем Михайлов болн Әрәсән Федерацин гешүн Путян Байр йөрәһәд эднә көдлмш күцәмҗтә болтха гиҗ дурдв. Сессьт батлсн сүв-селвг «Негдсн Әрәсә» партин улсин көтлврт орх, тернь иргч тавн җилин эргцд күцәгдх. Тана болн талдан салврин мергҗлтнрин сүв-селвг негдүләд, Хальмг Таңһчин делегац Ростов-на-Дону балһснд одх, тенд Хальмг Таңһчин Толһач Хаска Бату тана селвгиг партин Улсин көтлврт орулх, тер селвг цааранднь улм өөдән кемҗәнд хәләгдх гиҗ күндтә гиичнр темдглв.
Цааранднь таңһчин сурһуль-эрдмин салврин төрмүдин болн тедниг күцәлһнә тускар тодрха күүндвр болв, тер төрмүдиг хаһллһна сүв-селвгән чигн сүүрт орлцачнр өгв. Багшин кадрмуд селәнд чигн, балһснд чигн тату болҗана, селәнә сурһульмудт нег багш хойр зүсн кичәл өгдг йовдл баһ биш гиҗ келгдв. Тер төриг хаһлхин төлә багшин җалвинь өөдлүлхмн, селәдт бәәдг әмтнә җирһлин таалынь ясрулхмн, «Селәнә багш» гисн төсвиг дигтә-даратаһар тохрахмн гиҗ сессьт орлцачнр селвгән өгв. Цуг эн төсвиг күцәхин төлә шаңһа хазнас мөңгн һарһгдх зөвтә гиҗ багшнр заав.
Тер мет немр сурһуль-эрдм өглһнә керг селәнд ард хоцрҗана, терүнә төлә деер заасн кесг керг-төриг хаһлхла, селәнд билгтә күүкдиг асрҗ болхмн гиҗ орлцачнр заав. Сурһулин болн эк-эцкнрин хәрлцәг бас ясрулх кергтә, энүнә төлә эк-эцкин сурһулиг сәәнәр бүрдәх кергтә, тедниг олна бүрдәцсин үүлдврт орлцулхмн гиҗ багшнр болн экспертмүд заав.
Дарук талвңд таңһчд зуульчлһна салвриг делгрүллһнә тускар күүндвр болв. Энүнд зуульчллһна көдләчнр, шинҗләчнр орлцв. Эн харһлтд Хальмг Таңһчин залврин Ахлачин негдгч дарук Цернә Эрднь болн Элст балһсна депутатнрин Хургин Ахлачин дарук, «Хальмг үнн» газетин ах редактор Бембин Евгений зуульчлһна халхиг делгрүллһнә тускар тодрхаһар келв. Энткгин Наланда ик сурһуль Хальмг ик сурһульла нөкцлтин туск бооца батлв. Мана таңһчин делегац Энткг орн-нутгт бәәсн кемд тер нөкцлтин тускар Әрәсән элч медәд икәр өврв, тернь өөдән кемҗәтә хамцу үүлдврин тускар иткүлҗ, мана Хальмг ик сурһулин ончта күцәмҗ болҗана гиҗ элч келв.
Тер мет бидн Непалла, Азин талдан орн-нутгудла эмнлһнә болн сойлын салврар сән хәрлцә тогтаҗанавидн. Эн җил бидн Энткг орн-нутгин сойлын Өдрмүд Хальмг Таңһчд бүрдәхвидн, мана тал биичнр, дуучнр, киноактермуд ирх. Сойлын, сурһуль-эрдмин халхар нөкцлт делгрүлсн деерән экономик делгрүллһнә, инвестормудыг орлцуллһна керг бүтәх зура бәәнә. Маднд ода салг-үүлдвриг, селәнә эдл-ахуг делгрүлх кергтә, терүнә төлә кесг мөңгн кергтә. Маднла нөкцлтән делгрүлхәр бәәх орн-нутгуд тиим таал тогтах, тиим улсиг таңһчин экономикин кергүд күцәлһнд орлцулх кергтә, эдн мана таңһчд иткдгиг кех кергтә, тиигхлә эдн мөңгән мана төсвд орулх, терүнә улд көдлмшч орм үүдәҗ, әмтнд өөдән җалв өгч болҗана гиҗ таңһчин залврин Ахлачин негдгч дарук темдглв.
Делкән кесг орн-нутгиг орлцулҗах «Бамб цецгин» кубок болн нарт-делкән III шар шаҗна ик хург ик өөдән кемҗәтә керг-үүлдвр болв, эдн таңһчин инфраструктуриг ясруллһнд ик нилчән күргв, тернь зуульчлачнрт болн таңһчин олн улст ик туста болҗана.
«Элст балһсн хүврв, шин хаалһс, сурһульмудын, бичкдүдин садмудын гермүд, эмнлһнә гермүд тосхгдҗана, Әрәсән залврин дөңгәр тер ик кергүд күцәгдҗәнә. Тер шинрлтин улд зуульчлһн чигн делгрҗәнә. «Яндекс Путешествия» гидг бүрдәцин то-дигәр мана таңһч зуульчллһиг делгрүллһнә һоллгч 5 зөрүллтин тоод орҗана. Тер мет гиичлүрмүд тосхлһиг икдүллһнә 10 региона тоод мана таңһч йилһгдҗәнә.
Зуульчллһиг делгрүллһнд ик тәвцән Хальмг Таңһчин Толһач Хаска Бату орулҗана, Әрәсән залврин дөңгәр таңһчд кесг тосхлт күцәгдҗәнә, тер мет «Негдсн Әрәсә» партин төсвәр мана селәд болн райодт кесг шин объект эдлврт орулгдҗана гиҗ вице-премьер заав. Сессин йовудт талдан чигн мергҗлтнр тоолврарн хувалцҗ зуульчллһиг делгрүллһнә эв-арһ зааҗ, дамшлтарн хувалцҗ, сүв-селвгән орулв.
ТҮРВӘН Һуна

Видео