Шүлгин күчн ик

Сегодня, 13:28 | Общество, Таңһчин зәңгс, Зіњг, Сойл

Моһа сарин 13-д мана таңһчд хальмг шүлгләнә өдр темдглв. Хальмгин хәәртә үрн, Социалистическ Күч-көлснә Баатр, хальмг улсин алдр шүлгч Көглтин Даван 90 җилин өөнлә ирлцҗ, 2012 җилд эн өдр батлгдсн болдг.

Хальмг шүлглән төрскн келнә, тууҗин, сойлын, авг-бәрцин нег әңгнь болна. Айслулҗ бичсн сәәхн үгмүд нег талд олн-әмтнә седкл байсаҗ, нег таларн болхла кен-негинь үүмүлҗ нульмс асхрулҗ чигн чаддг. Үгин күчн гисн тер.
Көглтин Дава эврәннь үүдәврмүдтән хальмг теегин нүүдл улсин тууҗиг Әрәсән алдр орн-нутгла залһлдулҗ, дорас өсч йовдг үйнрт шүлгләнә үүдәврмүдәр дамҗад, төрскнч сурһмҗ авх кергтә гиҗ даңгин зааҗ йовла.
Алдр билгтин җирһлин хаалһнь адрута болсмн. Дәәнә болн тууврин һалд орад, энүнә җирһлнь амр биш болв чигн, ицлән геелго, үннәс цөкрсн уга… Үзсн күнд-күчр тоотан үүдәврмүдтән орулад олнд медүлсмн.
Хальмг шүлгләнә өдр угтад, таңһчд олн зүсн керг-үүлдврмүд давулгдна. Одахн Целинн района Деед Яшкулин сурһуль-интернатын көвүд-күүкд Мулан Наталья болн Аран Байрта багшнртаһан хамдан А.Амр-Санана нертә Келн-улсин дегтрин саңд болсн харһлтд орлцв. Әрәсән бичәчнрин ниицәнә хальмг әңгин һардач, шүлгч Бадака Татьяна сурһульчнрт Хальмг Таңһчин утх-зокъялын өдгә цагин бәәдлин тускар келв. Тер мет арвтнр хальмг бичәчнрин соньн һәәхүллә таньлдад, чееҗәр дассн шүлгүдән умшв.
Өцклдүр болхла Элст балһсна төвд Көглтин Даван бумблвин өөр олн-әмтн цуглрв. Тенд шүлгчнр, сойлын нертә үүлдәчнр, балһсна сурһуль-эрдмин бүрдәцсин оютнр болн сурһульчнр, шүлгләнд дурта бәәрн улс ирҗ орлцв. Әрәсән бичәчнрин ниицәнә хальмг әңгин элчнр «Төрскнә дуудвр» нертә утх-зокъялын марһана дииләчнриг ачлв. Терүнәс нань күн болһн шүлгләни туск ухан-тоолврарн хувалцад, дурта шүлгүдән айслулҗ умшв.
Алдр шүлгчин бичсн үүдәврмүд дорас өсч йовдг баһчудт келн-улсин зөөр болад, чик сурһмҗ өгч, бахмҗ үүдәхнь лавта.
КАРСАНА Евгения

Видео