Бумблвин өөрк һазриг кеерүлхмн

Одахн Элстд Зая-Пандитан нертә Хальмг этносойлын гимназьд «Буйслһн болн босхмҗ» гидг бумбин өөрк һазриг кеерүллһнә туск олна күүндвр болв. Энд Элст балһсна бәәрн әмтн, сурһульмудын багшнр болн шинҗләчнр цуглрв. Тиим харһлтс Хальмг Таңһчин Толһач Хаска Батун даалһврар болҗана. Олнд темдгтә бумбиг болн түүнә шидрк һазрин бәәдлиг ясруллһна даалһвр Элст балһсна һардврт өггдлә.

Балһсна һардврин ахлач Лиҗикә Алдр эн харһлтд келсәр, «Буйслһн болн босхмҗ» бумбин өөрк һазриг кеерүллһнә тускар сурһульчнрла, спортсменмүдлә, оютнрла, сойлын үүлдәчнрлә дигтә-дарата күүндвр болв. Эн туст эврәннь тоолвран медүлҗ өөрхн иргчд эн һазрин бәәдл яһҗ сольгдхиг Элст балһсна иргнмүд йилһҗ авх зөвтә, гиҗ Алдр Васильевич темдглв.
Яһад гихлә әмтн нертә скульптор Эрнст Неизвестный үүдәсн бумб тал ирҗ, Сиврин тууврт үлдсн элгн-садна санлынь тевчҗ тедниг бас нег тодлх, өөрхн бәәдг нәәмдгч болн йисдгч микрорайодын медәтнр чигн ирҗ энд сул цаган ачнр-зеенртәһән хамдан давулх.
Давсн җилд бидн Колонск боодгин эргндкиг яслһна туск төвән Әрәсән марһанд йовулад диилвр бәрләвидн, тер мет «Буйслһн болн босхмҗ» бумбин өөрк һазриг кеерүллһнә туск төсвиг орн-нутгин марһанд бас йовулҗ күцәмҗ бәрхәр седҗәнәвидн. Түүнә ул деер дарук җилд «Буйслһн болн босхмҗ» бумбин төсвиг экләд күцәхәр күсл бәәнә.
Мөчн сар күртл бидн эрлһән йовулх зөвтәвидн. Мөчн, така сармудын йовудт мана эрлһн хәләгдх, ноха - һаха сармудт болхла марһанд орлцсна ашнь олнд зарлгдх гиҗ тоолҗанав. Тиим кевәр мана төсвиг орн-нутгт дөңнсн угаһинь һаха сард медәд бәәхвидн. Элст балһсна әмтн эн керг-үүлдврт шунмһаһар орлцҗана. Кесг талвңд әмтн тоолвран медүлҗәлә, түүнәс туста кесг тоотыг керг-үүлдврин бүрдәһәчнр оньгтан авв гиҗ Элст балһсна һардврин ахлач заав.
Хальмг этносойлын гимназьд цуглрсн әмтн чигн тоолвран келв. Бумб тал деегшән һархла хаалһ уутьхн болна, бичкдүдлә тиигәрән давшҗ болшго, тегәд тер хаалһиг икдүлх кергтә гиҗ эдн заав. Түшг кедг юм бас тосхх кергтә гиҗ темдглв. Машиһән зогсадг орм чигн уга. Үвләр бичкдүд цанар энд дошна, тиим юмн учршгон төлә эднә төлә өөдмтә талдан һазр олҗ өгхмн эс гиҗ хаац бәрхмн гисн селвг өггдв. Энд бас модд суулһад, шамин то чигн икдүлхмн. Бумб зогсчах ормд хаша-хаац кех кергтә гиҗ әмтн келв. Цуг эднә селвг тоод авгдв. Тер мет бумбин өөрк һазрт, паркд аллеймүд, әмтн амрдг нань чигн тоот тосхгдх.
Элстин әмтн тер мет Колонск боодг кезә секгдхмб гиҗ олар соньмсна. Түүнә тускар хотл балһсна толһач бас тодрхаһар келҗ өгв. «Колонск боодгин төсв күцәлһнд удл уга зөв өгх гиҗ санҗанав. Ода сүл шинҗллт кегдҗәнә, дарук долан хонгт керг эклх зөв өггдх гиҗ тоолҗ болҗана. Маднд өгсн селвгиг бидн күцәх зөвтәвидн. Түүнә хөөн төсв күцәлһнд орлцхар седҗәдг бүрдәцс болн салг-үүлдврмүд дунд марһан зарлгдх, - гиҗ төсвин тускар Лиҗикә Алдр келв. – Моһа сарин чилгчәр-мөрн сарин эклцәр кен эн ик чинртә тосхлтыг күцәхинь бидн медҗ авхвидн. Тиим кевәр мөрн сард бидн тосхлтын көдлмшән эклхвидн, - гиҗ Алдр Васильевич цәәлһв.
Эн төсв тохрахин төлә орн-нутгин хазнас 100 һар сай арслң өггдв. Ут турштан 325 сай арслң эн тосхлһнд һарһгдх, түүнәс 225 сай арслңгиг Элст балһсна болн таңһчин хазнас һарһгдв. Тиим кевәр Цугәрәсән марһасин дөңгәр Элстин бәәдлиг сәәхрүллһнд ик көдлмш күцәгдҗәнә. «Буйслһн болн босхмҗ» бумбин туск күүндвр тиим кевәр төгсв. Тууврин күчр-күндиг дааҗ һарсн медәтнр чигн тиим харһлтст орлцв гиҗ келх кергтә. Элстин бәәрн әмтнә нилчәр хотл балһсн цааранднь чигн өсч-өргҗәд, сәәхрәд йовх гиҗ лавтаһар келҗ болхмн.

ТҮРВӘН Һуна