Йилһән сәәнәр сурдг оютнрла харһв

Сегодня, 17:01 | Общество, Таңһчин зәңгс, Зіњг, Сурєуль-эрдм

Мана таңһчин ик сурһульд оютнриг урмдуллһна кесг эв-арһ бәәнә. Болв ик кемҗәтә стипендь авхин төлә кесг невкрлә ирлцҗ сурх кергтә. Хамгин түрүнд сәәнәр сурад, тер мет номар соньмсад, олна керг-үүлдврт шунмһаһар орлцҗ, олнд үлгүр болҗ нерән дуудулад бәәхлә, тер ачлвриг авч болхмн.
Хальмг ик сурһулин шишлң комиссин шиидврәр ут турштан 175 күн тиим ачта стипендиг авх зөвтә болв. Тер тоод муниципальн заллтын, багшин болн нань чигн дацңгудын оютнр тиим күцәмҗ бәрв. Өөдән стипендиг авчадг оютнр номин статьяһан олнд темдгтә седкүлд барлна, Цугәрәсән марһаст орлцҗ мөрә авна, эврә төсвән күцәҗ, терүнд кесг улсиг, тер тоод сурһульчнриг орлцулна.
Хальмг ик сурһулин багшнрин дөңгәр оютнр номар соньмсад, өдгә цагин эв-арһиг эврә шинҗллтдән олзлна. Тер көдлмшән цааранднь магистратурт өргҗүләд, дарунь аспирантурт номин кандидатын диссертац харсхар зурална.
- Аспирантурт орх саната оютнрт сән таал тогтахар седҗәнәвидн, эн җил өңгәр сурдг әңгд хамгин түрүнд мана райодын болн Элстин элчнр орулгдх. Талдан регионас ирсн оютнр бооцана таалд мөңгән өгәд аспирантурт орна. Тиим кевәр бидн Хальмг ик сурһульд номтнрин селгә белдҗ, билгтә оютнрт онц оньган тусхаҗанавидн. Тернь мана ик сурһулин багшнрин ханьд билгтә баһ наста номтнриг орулҗ, кесг салврин шинҗллтиг улм өөдән кемҗәнд күцәхин төлә бат ул тогтаҗана, – гиҗ Хальмг ик сурһулин һардач Салан Бадм онц темдглв.
Тиим хол хәләцтә үүлдвриг эн һардач дөңнәд, вузин оютнр Хальмг Таңһчин болн төрскн сурһулин бүрдәцин нер дуудулҗ, Әрәсән болн нарт-делкән марһаст алтн медальмудәр ачлгдҗ, хальмг спортыг чигн туурулҗахинь темдглв.
Тернь чигн учрта, сүл җилмүдт хальмг оютнр спортын халхар диилвр бәрҗ йовна. Сән дамшачнрин дөң-нөкд, белдврин сән таал, өдгә цагин стадионмуд тиим күцәмҗ бәрхд туслна гиҗ темдглх кергтә.
Хальмг ик сурһулин оютнр абитуриентнриг орулҗ авлһна кергт орлцҗ, энд сурхар седҗәдг арвтнриг урмдулна. Сурһулин төлә ямаран таал тогтагдсна, һазадын орн-нутгудт болн Әрәсән нүүрлгч вузмудт дамшлт хоршаҗ болхин тускар келҗ өгәд, күүкд-көвүдиг соньмсулҗадг төрәр цәәлһвр өгнә. Арвтнр чигн эн багин баһ наста гешүдлә харһҗ күүнднә, тиим хәрлцән сән ашта болна, тегәд җил ирвәс хальмг ик сурһульд орҗах баһчудын то өсәд йовна.
Ода йилһән сәәнәр сурдг, өөдән стипендь авдг билгтә оютнриг эн кергт орлцулхар седҗәнә. Эдн эврә сурһульдан ирәд, оютнрин бәәдл- җирһлин, сурһулин болн амрлһна таалын тускар келҗ өгх, эндрк абитуриентнрлә кесг нуувчарн хувалцҗ тодрха цәәлһвр өгх. Ик сурһулин һардврин өгсн даалһвриг өөдән стипендь авдг оютнр арднь орҗ күцәхәр зүткчәнә, эднд шинҗләчнр чигн нөкд болад бәәх.
Тер көдлмшиг цааранднь гүүдүлҗ болхмн. Эн кергт ик сурһулин багшнриг бас орлцулҗ болҗана. Дунд сурһулян төгсәҗәдг баһчудас нань 7-9-ч классмудын сурһульчнрт, хамгин түрүнд селәдин сурһульмудын күүкдт оньган өгәд, теднә билг-эрдминь йилһҗ авхла туста болхмн. Үлгүрнь, эсвин, физикин, химийин, биологийин халхар теднә медрлинь шинҗләд, тедниг ик сурһульд орлһна кемд тааста эрдм шүүҗ авлһнд туслхла сән болхмн. Талдан һазрт сурхар йовхин тускар ухалшго, яһад гихлә эднд хальмг вузин багшнр болн оютнр ик оньган өгчәхинь медҗ гертән сурхнь лавта. Тиим көдлмшиг холас дасхлһна таалд йосн биш ухана дөңгәр күцәҗ болҗана, зуг сурһульмудла бәрдг залһлдаг тасрхан угаһар батрулад бәәх кергтә.
Тер көдлмшин тускар вузин һардачин дарук Натра Байр бас келв. «Белдвртә абитуриентнр маднд кергтә. Эдн иргчдән бас өөдән стипендь авдг болхмн, эднә төлә бидн җил болһн шин эрдмин көтлвр күцәнәвидн. Хальмг вузд гүн медрл авх, номин халхар көдлх цуг таал бәәнә, тер көдлмшиг кезә чигн өргҗүләд бәәхвидн»,- гиҗ Байр Александровна темдглв.
Билгтә оютнрла тиим туста күүндвр болв, эдн таңһчин иргчиг тосхх, тегәд эднә то өсәд бәәхлә туста болхнь лавта.
ТҮРВӘН Һуна

Видео