«Җаңһрин» тускар – Москвад

Сегодня, 13:07 | Общество, Таңһчин зәңгс, Зіњг, Сойл

«Әрәсән улсин алдр дуулврмуд» гидг төсвин йовудт мана «Җаңһрла» орн-нутгин хотл балһсна улс таньлдв.
Келн-улсин Москван Герт бүрдәгдсн VIII хургин йовудт «Җаңһрин» тускар күүндвр болв. Хальмг улсин урн үгин алтн зөөр болҗадг «Җаңһр» эн байрт орлцсн цуг улсин оньг йосндан авлв.
Тууль болҗ тодлгдсн Бумбин орна туск илдклмүд эн өдр соңсгдв. Бадм цецгин гүн учр-утхинь медүлгч соңсхврмуд чигн әмтнә оньгт тусхагдв. Хальмг улсин көгҗмин авъясмуд яһҗ үүдснә тускар күүндвр бас болв. Хальмгуд дуулсн цагт көгҗмин ямр зевсгүд айсинь дахулдг бәәсинь чигн энд ирсн улс медҗ авв. Хальмг улсин җаңһрч Манҗин Баатр дуулсн «Җаңһрин» бөлгүд болн улсин дуд әмтнд икәр таасгдҗ, хальмгудын сойлын байн зөөрлә таньлдх таал учрав.
Соньн эн керг-үүлдврт номтнр, сойлын үүлдәчнр, келмрчнр болн җаңһрчнр орлцснь нег үлү чинртә болв. Хальмгудын амн үгин зөөриг болн сойлыг эдн цуг халхаснь үзүлҗ чадв.
Хальмг улсин «Җаңһр» дуулвр - улсин сойлын зөөрин күчтә сән үлгүр болҗана, гиҗ эн керг-үүлдвриг секчәһәд, Келн-улсин Москван Герин һардач Сергей Ануфриенко келв.
Седкүлч болн багш Светлана Циммер хальмг баатрлг дуулврт нерәдсн керг-үүлдвриг һардҗ давулв. Соньн эн үүлдврин түүрвәч, бичәч болн этнограф Дмитрий Соколовин темдглсәр, Әрәсән келн-улсин дуулвр улс болһна цецн уха, зөргтә үүлдвр болн Төрскндән дурта боллһиг иткүлҗәнә.
Хальмгин залврин ахлачин дарук, Хальмг элчллтин ахлач Мучкинә Гернзл, Марий Эл Республикин даңгин үүлддг элч Бадм-Хаалһин Ольга, Әрәсән улсин герин, «Бумба» дегтр һарһачин элчнр эн керг-үүлдврт орлцачнриг йөрәҗ, үг келв.
Бичәч Дмитрий Соколов Хальмгин һол темдг болгч бадм цецгин тускар келҗ өгснь соньмслт үүдәв. Тууҗин номин доктор Лидия Соколова-Сербская хальмгудын хувцн цагин йовудт яһҗ сольгдҗ йовсинь цәәлһҗ өгв. Көгҗмч Кирилл Богомилов цуглрсн улсиг көгҗмин зевсгүдлә таньлдулв.
Җаңһрч Манҗин Баатрин дуулвриг дахулҗ, хальмг эрдмчнр билгән үзүлв. Хаана хувцн үзүлгдснә дару «Байрта» студин концерт болв. Деляш Уланова үүдәҗ белдсн хувцн чигн әмтиг соньмсулв. Зурач Галина Ушанован кегдлмүд бас таасгдв. Эн билгтин кеҗ һарһсн күүкд улсин кеерүл болхла нег үлү өврмҗтә болв.
«Җаңһрин» баатрмуд орн-нутгиг харсчана» гидг кино эн керг-үүлдвриг ашлв. Әрәсән улсин ниицлтин җилд болсн эн йовдл улсин хоорндк залһлдаг батлхд туслхнь маһд уга.
ҖИРҺЛИН Кермн

Видео