Седкүлчнрлә болсн күүндвр

Сегодня, 14:04 | Общество, Таңһчин зәңгс, Зіњг, Сойл

Шидр мана таңһчд Әрәсән күүкд улсин ниицәнә әңгүдин ик хург болв. Маднла хам-хоша бәәдг регионмудас ирсн гиичнр дунд Карачаево-Черкесин делегац бас билә. «Ногай давысы» газетин ах редактор-һардач Алтынай Атуова, «Черкес хэку» газетин ах редактор-һардач Люсана Абидокова болн «Солң» гидг бичкдүдин седкүлин ах редактор Мадина Асланукова делегацин ханьд ирсн болдг. Эдн мана таңһчд һурвн өдртән бәәһәд, хальмг улсин сойлла таньлдҗ, хальмг тег һәәхч цаган сергмҗтәһәр давулв. Хәрхиннь өмн гиичнр «Калмыкия» зәңгллһнә агентствд ирәд, хальмг барин көдләчнрлә харһад, эврәннь һарцсин тускар келҗ өгв.
Алтынай Атуова урднь мана таңһчур ирсн билә. Эн 2017 җилд Элстд болсн седкүлчнрин ик хургт орлцсн билә, тегәд нәәҗнртәһән харһсндан теңкән уга байрлв. Алтынай Юнусовна 2002 җиләс авн «Ногай давысы» газетиг һардҗана, эн Карачаево-Черкесин ачта седкүлч мөн. Ногай келәр барлгддг газетиг күсдундур миңһн күн умшдг болна. Люсана Абидокова болхла черкесск келәр һардг газет һардна, эн бас КЧР-ин ачта седкүлчин нер зүүнә, бичәч, һурвн дегтрин түүрвәч мөн. Мадина Асланукова бас ачта седкүлч, 2024 җилд Эльбрус уул деер һарснь бахмҗта болв.
- Мана республикд тавн келәр газетмүд болн бичкдүдин седкүлмүд һарна. Зуг «День республики» газет орс келәр долан хонгт һурвн дәкҗ, «Ногай давысы» ногай келәр, «Черкес хэку» черкесск, «Абазашта» абазинск болн «Къарачай» карачаев-балкарск келәр долан хонгт хойр дәкҗ һардгнь темдгтә. Республикин залвр маднд шаңһа дөң күргҗ, барт бичгдлһнд дем өгнә. Сүл җилмүдт барин туст амр биш бәәдл тогтв, тегәд бидн умшачнрин то икдүлх арһ хәәнәвидн. «Әрәсән пошт» барин һарцсин үниг өөдлүлнә, поштын көдләчнрин то баһрҗадг учрар тиим нәрн йовдл учрв. Арһта, төрскнч седклтә улсин дөң-нөкдәр баһ тетквртә улсин төлә һарцсан бичүлнәвидн, сурһулин бүрдәцст түгәҗ өгнәвидн. Баһчудыг соньмсулхин төлә өдгә цага эв-арһс олзлҗ газетин тойгудыг ниигмин сүлҗәнд бас тарханавидн, - гиҗ гиичнр эврә үүлдврин тускар келв.
«Калмыкия» зәңгллһнә агентствин һардач, таңһчин седкүлчнрин ниицәнә ахлач Марила Хоңһр нөкцлтән батрулҗ, бат залһлда бәрҗ үүлдхмн гиҗ селвг орулв. Эн җил Сочи балһснд болх Әрәсән седкүлчнрин хургт эрк биш харһад, иньгллтин залһлда батрулх кергтә гив. Харһлтд орлцсн «Хальмг үнн» газетин, «Байр», «Теегин герл» болн «Байрта» седкүлмүдин ах редактормуд һарцсиннь тускар бас цәәлһвр өгв. Гиичнр «Хальмг үнн» газетин музей, Келн-улсин телеүзлин студьс хәләв.
БАТАН Сәәхлә

Видео