Абхазин һазрт – «Бамб цецг» ансамблин концерт

Сегодня, 13:31 | Общество, Таңһчин зәңгс, Зіњг, Сойл

Хавр ирәд, Хальмг Таңһчд бамб цецгин байрин цаг ирнә. Тег нарна герлд уняртад сәәхрсн цагла, бамб цецгүд теңгрүр сунҗ, тег йосндан кеернә. Зуульчнр олар ирнә. Теегин сәәхн темдгин нер зүүсн «Бамб цецг» ансамбль хоша бәәдг республикүдт күрч, билг-эрдмән үзүлнә. «Танцы над Эльбрусом» гидг ик байрт эдн орлцв.
Эльбруст күрч, хәләврт орлцв
Хальмг Таңһчин «Бамб цецг» ансамбль Кабардино-Балкарьт болсн нарт-делкән амн үгин зөөрин ик байрт орлцв. Орн-нутгин үүдәгч олн коллективсиг негдүлсн хәләвриг эклсн байрин ик концерт Кабардино-Балкарин көгҗмин театрт болв. «Танцы над Эльбрусом» гидг нер зүүсн нарт-делкән хәләвр тиигәд өргмҗин бәәдлд эклсмн.
Амн үгин зөөрин эн байр кесг тәәз деер болдгарн темдгтә. Көгҗмин театрас нань драматическ театрин, шаңһа концертн бәәшңгин тәәз деер кесг һазрас ирсн артистнр билг-эрдмән үзүлв. Нальчикд болсн байрин өдрмүдлә Абхазин, Арменя, Беларусин, Ар үзгин Осетин, Хальмгин коллективсиг тосч авв.
«Салам алейкум, үүрмүд мини» гидг нертә көгҗмин-үүдәвр үзүлҗ концерт эклсмн. Кабардино-Балкарин улсин артистнр Амур Текуев болн Султан Хажироко, «Кабардинка», «Балкария» болн «Терские казаки» ансамбльмуд концертд орлцҗ, билг-эрдмәрн олн улсиг байрлулв. Концертин чилгчәр цуг орлцачнр эврә нутгин тугмудтаһан һарч ирсн йовдл байрин өврмҗтә ашнь болв.
Байрин ик концертд нер туурсн кесг коллективс орлцв. Теднә тоод Хальмг Таңһчин «Бамб цецг», дууна болн бииһин ансамбль өвәрц билг-эрдмәрн ончрв. Хальмг улсин ду-би цуглрсн улст икәр таасгдв.
Улсин ниицлтин җилд Хальмг ансамбль тиигәд ик күцәмҗтәһәр Кабардино-Балкарьт болсн амн үгин зөөрин нарт-делкән ик байрт күцәмҗтәһәр орлцв.
Хальмгудын билг-эрдм үзүлв.
Мөрн сарин 16-д Абхазьт Әрәсән сойлын Өдрмүд эклв. Хойр орн-нутгин сойлын залһлдана халхар эннь чинртә йовдл болҗана. Хальмг Таңһчин «Бамб цецг» ансамбль эн сойлын керг-үүлдврт орлцснь темдгтә болв.
Дууна болн бииһин ансамбль мөрн сарин 17-д Абхазин Р. Гумбан нертә шаңһа филармоня тәәз деер билг-эрдмән үзүлв.
«Энтн ик дааврта керг болҗана, - гиҗ ансамблин һардач, Хальмг Таңһчин билг-эрдмин ачта үүлдәч Катан Савр тоолврарн хувалцсмн. - Әрәсән олн келн-улсин сойл олнд үзүлнә гисн ик чинртә болсн деерән дааврта керг мөн. Мана артистнр даавртаһар көдлҗ, бәәрн хәләһәчнр эднә үүлдвриг өөдәнәр үнлв. Одахн гилтә «Бамб цецг» ансамбль Катарт болсн Әрәсән сойлын Өдрмүдт бас орлцла. Ода болхла бидн Абхазин һазрт хальмг улсин ду-бииг үзүлвидн.
Абхазин тәәз деер Хальмг ансамбль хаврин теегин сальк авч ирсн болҗ, хурдн авцта хальмг би үзүлҗ әмтнд сергмҗ үүдәв. Дууна болн көгҗмин айсмуд чигн олнд таасгдснь медгдв.
Хальмг Таңһчин ачта артистк Босхмҗин Диана болн нертә дууч Брюгидикә Айса дуд кен-негнәннь оньг авлв.
Цуг делкән оюни зөөр болсн «Җаңһр» баатрлг дуулврла цуглрсн улсиг Хальмг Таңһчин улсин артист Мукөвүнә Кутлан таньлдулв. Хальмг улсин тууҗиг болн өдгә цагиг ансамблин артистнр дууна, бииһин, көгҗмин дөңгәр үзүлҗ чадв. Хальмг улсин шаҗна йосрхлла таньлдулсн «Цам» олн хәләһәчнрт ик өврмҗтә болв. «Чичрдг» би болхла альд болв чигн әмтиг соньмсулҗ, мартгдшго йовдл үүдәнә. Артистнрин билг-эрдм болн хальмг улсин хувцн бас өврмҗтә болдгнь мел үнн.
Әрәсән сойлын Министерствд, «Росконцертд» «Бамб цецг» ансамбльд иим чинртә нәр-нааднд орлцх арһ учраснд Хальмг ансамблин директор Катан Савр ик ханлтан өргв. Эн йовдл билг-эрдмд меҗә угаг лавтаһар иткүлв.

УШКАНА Сувсн

Видео