Цергә госпитальд болсн концертд

25-04-2026, 11:35 | Общество, Таңһчин зәңгс, Зіњг, Сойл

Хальмг Таңһчин «Өөрднр» бииһин театр цергә шишлң керг-үүлдврт орлцҗадг дәәчнрт күрч, тер мет дәәнә госпитальмудт концертс үзүлҗ ик чинртә керг күцәҗәнә. Давсн җилд чигн эн билгтнр цергчнр эмнлһ авчадг госпитальмудт концертс бүрдәсн билә. Ода «Өөрднр» Әрәсән харслтын Министерствин медлд бәәдг Кубанск цергә сурһульд сурчадг баһчудт үзүлв.
Цергә эн сурһульд баһчуд дәәнә халхин цуг белдвр авдгинь темдглх кергтә. Әрәсән кесг регионас олн баһчуд энд цергә сурһуль дасчана. Мана орн-нутгла залһлда бәрдг нань чигн нутгудын элчнр энд бас сурна. Тер учрар чигн дәкәд өдгә цага нәрн бәәдлд концертс үзүлнә гиснь ик дааврта болна. Артистнр терүгинь медҗ, сән кевәр белднә.
Хальмг артистнрин ду-би баһчуд оньган өгч хәләв. Мана орн-нутгт олн келн-улс бәәхиг, келн- улс болһна билг-эрдмнь эврәһәрн соньн болдгиг цергчнр медҗ авв. Кесг һазадын орн-нутгудт билгән үзүлсн, нарт-делкән олн хәләврин дииләч «Өөрднр» бииһин театр цергә баһчудт йоста сергмҗ үүдәв. Сойлын иим залһлдан, билг-эрдмин үүлдәчнрин харһлтс, концертс улсин хоорндк залһлда батллһнд туста болна.
«Өөрднр» театрин балетмейстер Нәдвдә Владимирин келсәр, цергә сурһулин һардврт концерт таасгдв, дәкн иим харһлт кех кергтә гиҗ үрвр кеснь мана үүдәгч коллективин үүлдвриг өөдәнәр үнлсинь герчлҗәнә.
Әрәсән сойлын министерствин болн «Росконцертин» шаңһа көтлврин йовудт иим керг бүтв. «Өөрднр» бииһин театрин коллектив эн чинртә даалһвриг шунҗ күцәҗәнә.
Таңһчин хәләһәчнрән чигн эдн мартхш. Мөрн сарин 14-д Элст балһснд шаңһа филармоньд болсн «Өөрднрин» концертд ирсн олн хәләһәчнр байрлв. «Хальмг бииһин алтн көрң» гиҗ нерәдгдсн концерт ик күцәмҗтәһәр давв.
Түргн авцта «Чичрдг» би тәәз деер үзхләрн, әмтнә кесгнь халурхад, босч биилв. Хальмгудын авц-бәрциг, у-өргн седклинь медүлдг «Дөрвдә би», дурни седкләр дүүрсн «Тоһруна би» Хальмгин баатр Нәдвдә Петр белдҗ үзүлсн кецү сәәхн нань чигн би эн өдр әмтнд ик сергмҗ үүдәв.
Нер туурсн бииһин коллективин балетмейстер Нәдвдә Владимир белдсн олн соньн би әмтн таасч хәләв. Өдгә цага үүдәвр гүн учр-утхарн оньг авлҗ, бииһин эрдмин халхар уралан ишкдл кеҗ, ончта йовдлмуд учрна гиҗ тоолгдна. «Хуучн зург» гидг бииһин наадн нег өрк-бүлин җирһл үзүлсн деерән тернь цуг улсин тууҗла залһлдата болҗахинь медүлнә. «Улан Залата» гидг үүдәвр болхла хальмг улсин сойлан болн өвкнрин хувцан әрүнәр хадһлх кергтәһинь бииһин дөңгәр үзүлснь әмтнд тодлгдна. «Әмдрсн домг» гидг наадыг хәләсн күн болһн тууҗ болн өдгә цаг терүнд ниилсн болҗ үзүлгдснь әмтнә седкл авлна. Тиигәд Нәдвдә Владимир бииһин дөңгәр өвкнрин алтн зөөриг эндрк өдрлә залһҗ үзүләд хальмг би цааранднь делгрүлҗ йовхинь герчлнә.
Таңһчин сойлын җирһлд ончта йовдл болсн концертд Хальмг Таңһчин Улсин Хуралын (Парламентин) Ахлач Артем Михайлов болн таңһчин сойлын болн зуульчллһна министрин дарук Санҗрһа Герман артистнриг йөрәҗ, күцәмҗ дурдв. «Өөрднр» театрин һардач Нәдвдә Петрт болн театрин биич Василий Ивановд Улсин Хуралын (Парламентин) Ханлтын бичгүд бәрүлҗ өггдв.
Эврәннь йөрәлин үгдән Артем Михайлов таңһчд Бамб цецгин наадм болҗадг кемд иим концертин чинринь темдглв. Улсин билг-эрдмин авъясмудыг әрүнәр хадһлҗ, өсч йовдг үйнрт бииһин эрдм дасхлһнд ик тәвцән орулҗадг Хальмгин Баатр Нәдвдә Петрин шунмһа үүлдвриг зөвтәһәр үнлв. «Өөрднр» театрин кесг артистнр эн асхн Хальмг Таңһчин сойлын министерствин Күндллһнә һашгудар ачлгдв.
Әрәсән харслтын Министерствин даалһврар «Өөрднр» бииһин театр Әәдрхнд цергә госпитальд концертан үзүлв. Шишлң цергә керг-үүлдврт орлцҗадг цергчнр хальмг артистнрин концертиг соньмсад хәләв.
Цергчнрт ик сергмҗ үүдәсн концертин хөөн Әәдрхнә офицермүдин Герин һардачин дарук, цергә эмч, капитан Владимир Пшатов ухан-тоолврарн хувалцҗ иигҗ келв: «Цергчнрт сергмҗ үүдәҗ, омг өгдг иим концертс йир кергтә. Дәәнд авсн шаван эдгәҗәдг, дарани дәәлдәнд орхдан белдҗәдг цергчнрт иим харһлтс туста болад, урмдынь батлна».
«Өөрднр» бииһин театр иигәд орн-нутгин, таңһчин җирһлд орлцҗ, келн-улсин билг-эрдм делгрүлҗ, төрскн һазран харсч йовдг дәәчнрт омг-урмд өгч, хальмгудын нер өөдән бәрҗ йовна.
Цергә госпитальд болсн концертд
ҖИРҺЛИН Кермн

Видео