Номтнрин оньгт – йиртмҗ харлһна төр

Сегодня, 14:55 | Общество, Таңһчин зәңгс, Зіњг, Сурєуль-эрдм

Әрәсәд болн Хальмг Таңһчд йиртмҗ харлһна төрмүдт ик оньган тусхана. Нег үлү Хальмг Таңһчд һазр көдәрлһнә болн эргндк бәәдлд харшлҗадг тоотын төрмүд нәрн болҗана. Одахн Элстд Хальмг ик сурһуль бүрдәсн Цугәрәсән номин-дамшлтын III хург бас эн төрмүдт нерәдгдв. Һазадын орна кесг номтнр энүнд орлцҗ илдклән кев. «Йиртмҗ шинҗллһнә номин чинртә төрмүд өдгә цага номин медрлин ханьд» гиҗ эн хург нерәдгдв.
Тер мет Хальмг ик сурһулин профессор, биологийин номин доктор Саңһҗин Людмилан 80 җилин өөниг орн-нутгин номтнр байрин хургин йовудт өргнәр темдглв. Людмила Халгаевнан күцәсн номин аһу ик көдлмш Әрәсән биологийин номин болн экологин шинҗллтин делгрлтд зөвтә орман эзлнә гиҗ хургт келгдв. Хальмг номт 30 һар җилдән экологийин болн геохимийин шинҗллтән күцәҗәнә, 2006 җилд мана таңһчин экологийин төрмүдт нерәдсн докторин номин диссертациг Шартун ик сурһульд харсла. Ода Людмила Халгаевна Хальмг ик сурһулин химийин болн фармацевтикин эв-арһин тиңкмин профессор болҗ көдлҗәнә.
Өмн үзгин шаңһа ик сурһулин элчнрин баг бас хургт орлцв, энүг биологийин номин доктор, профессор Татьяна Минкина һардҗ ирв. Күндтә гиичнр нертә хальмг номт Саңһҗин Людмилаг йөрәҗ, Тең деерк Ростовин болн Хальмг Таңһчин номтнрин хоорндк олн җилин нөкцлтиг, номин сурһульмудын хамцу көдлмш темдглҗ терүнә ашт баһ наста билгтә номтнрин то өсчәхинь темдглв.
- Бидн кесг җилдән залһлда бәрҗ үүлдҗәнәвидн. Тер тоот маднд экологийин кесг төр хаһллһнд туслҗана. Нег үлү Хальмг Таңһчд һазр көдәрлһнә төр ик чинр зүүҗәнә, юңгад гихлә таңһчин һазрин ик кемҗәнь элснд авгдсн орм гиҗ Европд тоолгдна. Мана хойр региона номтнр эн төрәр шинҗллтән кеҗ, бас экологийин кесг төриг өдгә цагин кемҗәнд күцәлһнә туст нилчән күргҗәнә.
Мана Өмн үзгин ик сурһулин 15 номт Элстүр ирв, номин хургин көтлврт чинртә төрмүд босхгдҗана. Мана номтнр һазр шинҗллһнә, экологийин, молекулярн биологийин, тооһин шин эв-арһсин төрәр илдклән кев. Тер тоод давста һазриг шинәс ясруллһна төрәр бас дамшлтарн хувалцув, - гиҗ профессор Татьяна Минкина келв.
Өмн үзгин шаңһа ик сурһульд бас хальмг номт, биологийин номин кандидат Манҗин Саглр көдлҗәнә. Номт бас соньн төрәр илдкл кев. Тең деерк Ростовин болн Хальмг Таңһчин номтнрин нөкцлт өргҗүллһнд номт ик нилчән күргҗәхнь темдгтә.
Тер мет Энткгәс ирсн номт Танвар Судип бас экологин төрәр зәңглв. Өдгә цагин эв-арһиг, тер тоод йосн биш ухана эв-арһиг, экологийд олзллһна тускар номт келв. Пакистана номт Мехмуд Насир йиртмҗд харшлҗадг тоотын төрәр дамшлтарн хувалцҗ, тер төриг хаһллһна туст селвгән өгв.
Талдан чигн регионмудын болн һазадын орна номтнр Элстд болсн нарт- делкән хургт орлцҗ, йиртмҗин бәәдлин туск номин шинҗллтиг улм гүүнәр күцәх болҗ үгцв.

ТҮРВӘН Һуна
Зургт: (зун талас) Өмн үзгин шаңһа ик сурһулин профессор Татьяна Минкина болн Хальмг ик сурһулин профессор Саңһҗин Людмила нарт-делкән хургин йовудт

Видео