Оютнрин билг-эрдминь үнлв

Сегодня, 11:42 | Общество, Таңһчин зәңгс, Зіњг, Сурєуль-эрдм

Найн негн җил хооран хөн сарин 9-д Улан Әәрмин салдсмуд, тер тоод хальмг баатрмуд, Алдр Диилвр бәрҗ Берлинә рейхстагд Советин Союзин улан туг делскв. Тер ончта өөнд нерәдҗ Элстд Хальмг сойлын Төвд таңһчин колледжмүдин үүдәлтин III наадм болв. Ут турштан 10 колледжин оютнр дууна, бииһин, шүлгүд умшлһна, театрин наадна марһаст орлцв.
- Бидн СоцТех РГУ-н Хальмг әңгд сурчанавидн. «Нүүдг улсин би» гидг мана ансамбль «Хөн сарин вальс» би багш Болдра Николайин һардврт белдв. 16 көвүн-күүкн бииләд, билг-эрдмән үзүлв, - гиҗ колледжин оютн Артем Залюбовский келв.
Чонкуша Петрин нертә билг-эрдмин колледжин оютн Георгий Габисовин келсәр, баһчуд тәәз деер һарч дәәнә цагин туск шүлгүд умшв. Оютнрин театрин баг хальмг бичәч Дорҗин Басңгин тоһруна туск домгар наад тәвв. Оютнр колледжин һардач Эрнҗәнә Лилиян һардврт эн наад белдв. Дәәнә йовудт мана өвкнр баатр йовдл һарһсиг эндрк үй седклдән хадһлх зөвтәг оютнр медүлв.
Дарунь наадм байрин бәәдлд секгдв. «Созвездие», «Жемчужина» бичкдүдин ансамбльмуд дәәнә цагин дууна айсмуд дахад би биилҗ оютнриг урмдулв. Тер мет Хальмг Таңһчин ачта артистк Ангелина Серова олнд темдгтә «Нам нужна одна победа» гидг ду дуулв.
Цааранднь шүлг чееҗәр айслулҗ умшлһна марһан эклв. СоцТех РГУ-н Хальмг әңгин оютн Дорҗин Цаһан бичәч Нармин Морхаҗин «Днепр» гидг шүлгинь хальмг келәр умшв. Күүкн шүлгин учр-утхинь сәәнәр медүлв. Энүнәс нань талдан күн хальмгар шүлг умшсн уга. Иим чинртә марһаст оютнр хальмг шүлгчнрин үүдәврмүдиг төрскн келәр умшхла ик туста болхнь лавта, тиим кевәр эдн төрскн келән улм сәәнәр медҗ авх, медрлән чигн байҗулх. Эс гиҗ зуг хальмг шүлгүд умшлһна марһа бүрдәсн болхла улм ке болх билә гиҗ сангдв.
Нертә шүлгч Юлия Друнинан «Зинка» гидг шүлгиг Башантан колледжин оютн Дарья Кириллова сәәнәр умшв. Жюрин шиидврәр энүнд марһана дииләчин нерн зүүлһгдв. Тер мет билг- эрдмин колледжин оютн Бембин Байр нертә орс шүлгч Александр Твардовскийин «Василий Теркин» поэмин нег тасрха умшч йилһрв. Эн хойрдгч орм эзлв, хальмг келәр шүлг умшсн Дорҗин Цаһан һурвдгч ормд һарв.
Наадмин байр өргмҗтә болв. Оютнрин бииһин ансамбльмуд хәләһәчнрин зүрк авлснь лавта. Эдн цугтан дәәнә цагин хувц өмсәд тәәз деер һарснь мана баһ наста аавнр-ээҗнр дәәнә түрүн өдрмүдт көвүдән фронтд йовулҗасн кем үзүлсн болҗ медгдв. Т.Хахлынован нертә медицинск колледжин оютнр олнд темдгтә «Тоһруд» дууна айсар дамҗад әәмшгтә дәәнд үүрмүдән үдшәлһнә би үзүлв. Чонкуша Петрин нертә билг-эрдмин училищин оютнр бас билгәрн ончрв, эднә «Байр» ансамбль «Салдсмудын би» үзүлв. Иргчдән артистнр болх баһчуд кесг нәр-нааднд орлцҗ олн әмтиг байрлулна, тегәд чигн колледжмүдин оютнрин билг-эрдминь улм өргнәр үзүлх кергтә. Канука Хартин нертә Элстин багшин колледжин оютнр «Диилврин вальс» бииләд, дәәнә цагиг тодлулв. Сурһулин бүрдәцсин багшнр ик көдлмш күцәһәд сән концерт белдҗ.
Дуучнр бас эврә билг-эрдмәрн ончрв. Чонкуша Петрин нертә колледжин оютн Мила Сенькина «Россия» дууһан йир сәәнәр дуулҗ әмтнә седкл авлҗ йилһрв. Болв эднә багд нефтин болн газин колледжин билгтә дууч Джувинә Артем түрүн орм эзлв. Медицинск колледжин элч Арзан Нәәмн хойрдгч ормд һарв. Канука Хартин нертә багшин колледжин дуучнрин баг һурвдгч орм эзлв. Эдн цугтан дәәнә цагин дуд дуулҗ тер күнд-күчр кемиг ирсн әмтнә уханд сергәв.
Аштнь жюри марһана дииләчнрин нерд олнд соңсхв. Биичнрин марһанд дииләчнриг йилһҗ авхд амр болсн уга. Тиим болв чигн жюрин шиидврәр түрүн ормд билг-эрдмин колледжин бииһин баг һарв. СоцТех РГУ-н Хальмг әңгин ансамбль 2-ч орм эзлв, медицинск колледжин оютнр һурвдгчнь болв.
Эн наадмиг таңһчин сурһуль-эрдмин болн номин, сойлын болн зуульчллһна министерствс бүрдәв. Тер мет «Навигаторы детства» төсвин Хальмгин әңгин төв бас марһана бүрдәһәчнь болв. «Эндр бидн сойлын делгрлтин Төвин тәәз деер «Алдр Диилвр» гидг таңһчин наадм давулвидн. Ода төрскнч сурһмҗ өглһнә керг ик чинр зүүҗәнә. Яһад гихлә эндрк баһчуд Төрскән харсгч Алдр дәәнә тускар фильмсәс болн дегтрмүдәс меднә. Эврә үүдәлтәрн дамҗад эдн баатр өвкнрин тускар сәәнәр медҗ авхнь лавта. Тер мет Хальмг Таңһчин Улсин Хуралын (Парламентин) депутат Цекрә Зултад ханлтан өргхәр седләв. Зулта Евгеньевич мана наадм бүрдәлһнд шунлттаһар орлцад, нөкд болв», - гиҗ «Навигаторы детства» төсвин таңһчин әңгин зүүцүлгч һардач Санкан Екатерина келв.
Оютнрин театрин багмуд Алдр Диилврин өөнд, тер цага баһчудт эврә наадан нерәдв. Жюрин тоолврар, хамгин соньн наадыг билг-эрдмин колледжин баһ наста актермуд үзүлв, тегәд эднд дииләчин нерн зүүлһгдв. Хойрдгч ормд хулд-гүүлгәнә –технологин колледжин оютнр һарв. Элстин политехникин колледжин артистнр һурвдгч орм эзлв.
Таңһчин сурһуль-эрдмин болн номин министр Александр Ким, сойлын болн зуульчллһна министрин дарук Санҗрһа Герман, таңһчин цергә комиссарин нөкд Валерий Лукьянченко оютнриг йөрәҗ, билг-эрдминь темдглв. Дәәнә йовудт мана өвкнрин залу-зөрмг йовдлыг тодлҗ, теднә күцәсн алдр кергинь бичә марттн гиҗ эдн темдглв. Сойлын делгрлтин Төвин шин герт тадн билг-эрдмән үзүлҗәнәт, эн йовдл тана үүдәлтин делгрлтд туслтха, гиҗ дурдв.
Наадмд белдлһнә кемд колледжмүдин багшнрин, хореографмудын аһу ик көдлмш бас өөдәнәр үнлх зөвтәвидн, эднә нилчәр оютнрин үүдәлтин кемҗән җил ирвәс өсәд йовна, эдн эврә эрдмән дассн деерән сән билгтнр болхнь лавта.

ТҮРВӘН Һуна

Видео