Хол һазрин соньн үүдәлт

Сегодня, 12:24 | Общество, Таңһчин зәңгс, Зіњг, Сойл

Энткг орн-нутгин сойлын Өдрмүдин йовудт Энткгин фильмин наадм болв. Эн керг-үүлдврт хол орн-нутгин Джамму болн Кашмир хойр штатас ирсн артистнр болн режиссермуд орлцв. Эднд хальмг ут дун икәр таасгдв. Энткгин көгҗмлә әдлхн болв, тана эн ду мана орн-нутгин әмтнд соңсулхла сән болх гиҗ артистнр тоолвран келв. Энткгин кинон Өдрмүдт ЭлсТегәд Энткгин кинон наадмин товчлгч керг-үүлдврт эдн бас кинотеатрт олар ирв. Нам суудг орм олҗ авхд амр биш болв. Байрин керг-үүлдвриг нүр үгәр Хальмг Таңһчин Толһач Хаска Бату секв. «Мана таңһчд Энткгин сойлын Өдрмүд давҗана, тернь маднд ик байрта-бахта йовдл болҗана. Мадниг кесг тоот залһлдулҗана. Бидн цугтан Энткгин фильм хәләхдән дуртавидн. Мини эк баһ настадан бас эк-эцктәһән хол орн-нутгин фильмсиг таасч хәләдмн. Би бас Лагань балһснд өсч - бослав, тенд зуни кинотеатрт үзүлҗәсн Энткгин кинофильмсиг хәләдг биләв. Мана таңһчин болн Әрәсән әмтнд тер фильмс таасгдна. Эндр үзүлҗәх «Усн» нертә фильм намаг икәр соньмсулв.
Бидн ода бас усна төр хаһлҗанавидн. Әрәсән һардвр мадниг эн халхар икәр дөңнҗәнә. Элстүр усн ирҗәдг сурвлҗиг бидн шинрүлвидн. Ода бидн Иҗл һолас ус авч, ик сурвлҗ тосххар зуралҗанавидн, райодын усна сурвлҗиг бас шинрүлҗәнәвидн. Левокумск усна көрңгиг олзлх зура бас бәәнә.
«Усн» нертә фильм цугтаднь таасгдх гиҗ санҗанав. Терүг үүдәсн режиссермүдт болн артистнрт ханлтан өргҗәнәв. Тер мет 2025 җилин хулһн сард Элстүр Энткгәс Бурхн Багшин әрүн тоот авч ирлә, Энткг нутгт бәәдг ахнр-дүүнрт ик гидгәр ханҗанав. Мана һазр тиим кевәр әрвслгдсн болҗана, түүнд иткҗ, цуцрлтан угаһар көдлҗ, мана баһчудт сән сурһмҗ өгх кергтә, ах улсан күндлтн, уралан йовҗ күслдән күртн»,- гиҗ таңһчин Толһач товчлв.
Цааранднь Хазн балһснд үүлдг Энктгин элч Джейсундхар үг авч, таңһчин Толһачд, таңһчин залврт, Элстин һардврт ханлтан өргв. Түрүн болҗ бидн тиим наадм давулвидн, иргчдән тернь җил болһн бүрдәгдәд чигн бәәх, гиҗ күндтә гиич темдглв.
Цааранднь фильмин сценарист Нитин Диксит үг авч, эврә үүдәврән Әрәсәд үзүлх арһ үүдснд ик байрта бәәхән медүлв. Таднд, хәләһәчнрт, Махараштра штатас ирсн кинофильм таасгдтха гиҗ йөрәв. Фильмд дурна, бәәдл-җирһлин күчр-күндиг яһҗ диилхин тускар келгднә.
Фильмин хөөн хәләһәчнр сценаристд болн артистнрт сурврмудан өгәд күүндв.
ТҮРВӘН Һунатин бәәрн улс «Октябрь» кинотеатрт ирҗ, соньн кесг фильм хәләв.

Видео