Сойлын наадм олн-әмтиг хамцулв

Сегодня, 12:27 | Общество, Таңһчин зәңгс, Зіњг, Сойл

Урҗ өдр Элстин Диилврин талвңд дәкнәс олн-әмтн цуглрв. Һурвн хонгтан Энткгин сойлын Өдрмүд давад, ашлгч байрин керг-үүлдвр болв. Хөн сарин 10-ас авн 12 күртл нег һазра мана улс Энткгин сойлла, тууҗла, авг-бәрцлә өөрхнәр таньлдад, тер һазра кино хәләһәд, хотынь амсад, цаган сергмҗтәһәр давулв.
Энткгин Одиша, Гуджарат болн Пенджаб һурвн штатын сойлын коллективс эврә билг-эрдмән олнд тусхасн болдг.
Керг-үүлдвриг Хальмг Таңһчин сойлын болн зуульчллһна министр Бембин Евгений секв.

– Мана таңһчиг Энткгин орн-нутгла олн тоот залһҗана. Бидн нег бурхнд шүтдг, орн-нутгудын хоорндк нөкцлт чигн цаарандан делгрҗәнә. Һурвн өдртән болсн сойлын наадм нидн Элстд бүрдәгдсн шар шаҗна нарт-делкән ик хургин йовудт зуралсн тоотын ашнь болв гиҗ келх кергтә. Нег һазра улсин нерн деерәс Хальмгин, Энткгин сойлын төвин һардврт болн элчллтд ик ханлтан өргҗәнәв. Эн байр уданд тодлгдхнь лавта, – гиҗ Евгений Владимирович темдглв.
Хазн балһснд Энткгин элч Джейсундхарин келсәр, Хальмгт болсн сойлын наадм сән йовудтаһар давв. Энүнд белдәд, керг-үүлдвр яһҗ бүрдәгдх, яһҗ давх гиҗ ухалҗалав. Тана таңһчин иргнмүд мадниг бүләнәр тосад, байр үр-иньглгч таалд давсинь эн онц темдглсн болдг. Ирлцңгү Өдрмүдиг Хальмгт дәкәд чигн бүрдәҗ болхмн, гиҗ эн седклән медүлв.
Һурвн өдрин туршарт Энткгин болн мана таңһчин артистнр хоорндан таньлдад, дамшлтарн хувалцад, аштнь билг-эрдмин хамцу көтлвр бүрдәв. Ашлгч концертин йовудт «Бамб цецг» ансамблин оркестр Москвад Энткгин элчллтин улд бәәдг сойлын төвин артистнрлә хамдан Манҗин Аркадин үүдәсн «Ом мани падме хум» болн «Автопортрет» хойр үүдәвринь олнд соңсхв.
Тиигәд, Энткгин сойлын Өдрмүд мана таңһчд сән йовудтаһар, олна орлцлһтаһар бүрдәгдснь ик чинртә йовдл болв.

КАРСАНА Евгения

Видео