Самһа улс болад

Хөн сарин 21-д зарһин приставмуд үрдән асрдго эк-эцкнрин хайгудар одад, ирлцңгү керг-үүлдврт орлцв. Һундхас, эднә ик зунь бултад, бәәдг орман соляд, үүдән секлго бәәв.
Күсдундур сай һар арслң өртә нег эцкин хайгар ирхлә эн гертән бәәҗ. Өрән эс даңцахла чаңһар засглгдхин тускар энүнд цәәлһв. Өдгә цагт эн залу көдлҗәхш, тегәд өрән даңцаҗ чадҗахш. Зуг шидр эн шишлң сурһульд сурад, маначин хату цаас авсмн. Удл уга көдлмшт орад, үрән асрлһна туст бәәсн өрән даңцах болҗ үгән өгв. Тиигсн бийнь өлг-эднь бәрәнд авгдв.
Дарунь дәкәд өртә нег эцкин хайгар приставмуд ирв. Энүнә өрнь 800 сай арслң тогтаҗана. Сар болһн эн үрндән мөңг илгәнә, зуг өрнь йир ик болад, бүклднь даңцадг арһ уга болҗана. Урднь энүнә эдлврт бәәсн «КамАЗ» тамһта машин бәрәнд авгдсн билә. Терүнәс нань авальтаһан салсн бийнь урднь хамдан бәәсн герин дөрвнә нег хүвнь энүнә нернд бичгдсн бәәҗ. Эн хүвән салсн гергнә зөөрт орулад, өрән даңцаҗ чадв.
Эндр таңһчин приставмудын заллтд бүтәгдсн ирлцңгү 869 кергүдин өрнә кемҗән 253 сай арслң тогтана. Хөн сарин 21-д кесн то-дигәр, заллтын приставмудын күцәсн көдлмшин ашт 97 сай арслң бичкдүдт йовулгдв.
Ирлцңгү керг-үүлдврмүд даңгин бүрдәгднә. Һарһсн үрдтән чик сурһмҗ өгч, сурһх зөвтәвидн. Тер мет насни дигт күртл күүкдән асрх бас кергтә, гиҗ приставмуд даавр уга эк-эцкнрт дәкнәс тодлулҗана.
ОЛЬДАН Цаһан