Цаһан Уснд суврһн босхгдв

09-06-2026, 11:01 | Общество, Таңһчин зәңгс, Зіњг

Яшкулин района Цаһан Усн селәнд Эвин суврһна эргндк бәәриг ясч цеврллһнә көдлмш төгсв.
Эвин суврһн эн һазрин улс цуглулсн мөңгәр босхгдсмн. Суврһ тосхлһнд буйнч седклтә нань чигн улс дөңгән күргсмн. Ода шаҗна эн тосхлт селәнә паркд дүңгәҗ олн улсиг тосч авчана.
Суврһна өөрк бәәриг шинрүләд, цуг көдлмшинь бәәрн әмтн эврән күцәв. Мөңг цуглулад, кергтә тосхлтын материалмуд хулдҗ авад, суврһна эргндкиг кеерүлв.
Бәәрн һазрин әмтн суврһнд тәвгдх әрүн тоотыг цуглулв. Олн ном, шүтән болн әрүн нань чигн тоот шаҗна цуг йосар суврһнд орулгдв. Цуг тоотнь ном умшҗ кегдсмн.
Цаһан Усна суврһ секлһнә байрин үүлдврт олн күн ирҗ орлцвНер туурсн Дрепунг Гоманг хурлын шаҗна үүлдәчнр оюни халхар залһлда бәрх күслтәһәр ирсмн.
Хальмг Таңһчин Улсин Хуралын (Парламентин) депутат Кокан Михаилд селәнә әмтн ханлтан өргв. Суврһ босхлһнд депутат ик дөңгән күргсинь әмтн тиигҗ үнлв.
Цаһан Усна СМО-н ахлач Баатра Эрднь цуглрсн әмтиг ик чинртә эн йовдлла йөрәв. Эвин суврһиг босхлһнд күн болһн орлцсиг зааҗ келв.
Депутат Кокан Михаил эврәннь үгдән селәнд босхгдсн суврһна өвәрц чинринь заав. Энд бәәдг цуг улсин болн әмтә тоотын амулңта җирһлин төлә суврһн босхгдсинь темдглв.
Селәнә күндтә медәт Четрә Нина суврһ босхлһнд орлцсн цуг улст үнн седклин ханлтан медүлв. Эвин суврһна евәлд цугтан ниитәһәр, кен-негндән дөң болҗ эвәр бәәтн, гиҗ медәт цуг улсиг йөрәв.
Суврһудын өлзәтә чинрин тускар Бурхн Багшин Алтн сүмин багш гецл Туптен Цультим эврәннь йөрәлин үгдән келв.
Дрепунг Гоманг хурлын гелңгүд байрин мөргүл давулв. Цаһан Уснд босхгдсн Эвин суврһн оюни чинрән әмтнд хальдасн деерән талдан һазрин әмтн чигн нааран ирҗ, зальврҗ, седклән төвкнүлҗ чадхмн.
УШКАНА Сувсн

Видео