Манла Бурхнд зальврад

09-06-2026, 11:13 | Общество, Таңһчин зәңгс, Зіњг

Җил хооран Элстд Бурхн Багш һарсн, Гегәрлтин хаалһд орсн, махапаранирванад залрҗ һарсн өдрлә П. Жемчуевин нертә таңһчин эмнлһнә өөр Манла бурхна суврһн босхгдсн билә. Олн күн зальврҗ нааран ирнә.
Суврһиг босхсна җилин өөнд нерәдәд, хальмг билгтнр дууһан өргҗ, көгҗмин айсар күндллһән медүлв. Бурхн Багшин Алтн сүмин гелңгүд шаҗна йосрхл күцәһәд, энд мөргүл давулв.
Хөн сарин 31-д болсн эн керг-үүлдврт олн күн ирҗ орлцв. Хальмг Таңһчин Толһачин селвгч Корнян Геннадий цуглрсн улсиг йөрәҗ үг келв. Манҗин Аркадин нертә Хальмг госфилармоня артистнр болн Элстин бичкдүдин билг-эрдмин 2-ч тойгта сурһулин күүкд билг-эрдмән үзүлв.
Хальмгин нертә дуучнр Очкан Анна болн Һәрән Лиҗ дуулсн дуд цуглрсн улсин седкллә ирлцәд бәәв.
Любовь Дохаева һардҗадг «Байрчик» ансамблин татсн көгҗм концертин сергмҗтә ашлвр болв.
Таңһчин эмнлһнә ах эмч Чумпинә Саглр эн суврһна өөр шаҗна нарт-делкән һурвдгч хургт ирҗ орлцсн Мьянман болн Шри-Ланкан хувргуд болн номтнр шаҗна йосрхл күцәҗ, лекцс умшсинь тодлулв. «Манла Бурхна суврһнд көгҗмин белгән нерәдлһн мадна төлә ик чинртә йовдл болҗана. Күцәсн әрүн кергин буйн кесг холванд өсхмн» - гиҗ Чумпинә Саглр эн керг-үүлдврин чинринь темдглв.
Манла Бурхнд зальврад
Манла Бурхнд зальврад

Видео