Элстд секгдсн соньн һәәхүл

Сегодня, 11:29 | Общество, Таңһчин зәңгс, Сойл

Н. Пальмовин нертә Келн-улсин музейд соньн һәәхүл секгдв. Белорус келн-улсин хувцнла энд таньлдҗ болхмн. Давсн җилд музейин һардач Мучан Ирина Беларусьт одад, тенд Келн-улсин тууҗин музейин һардврла харһад, нөкцҗ үүлдлһнә туск бооца батлсмн. Ода терүнәс иштә белорусь улсин эн һәәхүл Элстд үзүлгдҗәдг болв.
Үүдәгч нөкцлтин йовудт 2025 җилин намрар Беларусьт Келн-улсин тууҗин музейд. Н. Пальмовин нертә Келн-улсин музей хальмгудын нүүдл җирһлиг үзүлгч тоотыг тенд үзүлсн билә.
Ода Элстд белорус келн-улсин хувцна һәәхүл үзүлгдҗәнә. «Келн-улсин хувцнд орсн зег кеерүл. Эс мартгдсн авъясмуд» гидг һәәхүллә олн элстихн болн хотл балһсна гиичнр таньлдҗана. Хойр келн-улсин сойлын залһлдана улд кегдҗәдг һәәхүл әмтнә оньг авлҗана. Беларусь Республикин Келн-улсин тууҗин музейин көрңгәс авч ирсн кегдлмүдлә таньлдх арһ олн хәләһәчнрт учрв. Келн-улсин хувциг ямаран кевәр кеерүлдг бәәсинь, кеерүлин ямаран эв-арһ болн янз олзлдгинь һәәхүлд тәвгдсн тоот медүлҗәнә.
Залу улсин, күүкд улсин, бичкдүдин хувцнд ямаран йилһвр бәәсинь чигн һәәхүлд медгднә.
Белорус келн-улсин җирһлд батрсн «строй» гидг нертә хувцн бәәнә. Тер хувцнь эдниг тер дарунь медүлнә. Келн-улсин хувцна салһгдшго нег әңгнь тернь болҗана. Деед Полесьед, Поднепровин эргнд, Беларусин цутхлң һазрар бәәдг әмтн өмсдг хувцн болн бәәцд олзлдг өлг-эд күртлән энд тәвгдснь ирсн улсин оньг авлна. Хувц уйдг улст эннь нег үлү соньн болҗана.
Һәәхүлд тәвҗ үзүлгдҗәдг киилгүд, майгуд, олн зүсн махлас эврә өвәрц янзта, эдин ниилвр, ишксн янз болн шаглар күртлән онц йилһвртә болдгинь үзхд йир өврмҗтә. Хувцан кеерүлдг тоотнь чигн соньн болдгинь номтнр болн уячнр темдглҗәнә.
Хувцнд орулдг эдин өңгнь бас эврә чинртә болдгчн. Иигәд цаһан өңг цевр-цер бәәдлин темдг мөн. Улан өңг нар тодлулҗ, җирһлин темдг болна. Хар өңгтә тоот һазрин болн өвкнрин темдг болҗана. Дәкәд нег соньн юмн. Хувцна кеерүл күүнә нас кеҗәдг көдлмш, өрк-бүлтә угаһинь медүлдгнь йир соньн гих кергтә.
Белоруссин хувцна туск һәәхүлд үзүлгдҗәх тоот эрдмин халхарн йир соньн болсн деерән номин шинҗләчнрт чигн хәәвртнь туслх гиҗ сангдна. Улсин җирһлд авъяс болҗ тохрсн тоотыг ода күртл хадһлад, хувцндан орулҗ бәәхнь сән йовдл болҗана.
Ирлцңгү соньн һәәхүл хөн сарин 22-т эклҗ көдлсмн. Нааран әмтн тасрхан уга ирнә. Мөчн сарин 30 күртл соньн эн һәәхүллә олн-әмтн таньлдҗ чадхмн.
Белорус келн-улсин урн һарин эрдмлә таньлдад, талдан келн-улсин сойлыг медҗ болхмн. Хальмг Таңһчин Келн-улсин музейин болн Беларусь Республикин Келн-улсин тууҗин музейин нөкцлтин ашт болҗадг һәәхүллә таньлдх цаг ода чигн бәәнә.

ҖИРҺЛИН Кермн

Видео