Төрскн нутгтан шүлгүдән нерәдәд

Көтчнрә района ах үйин улс күч-көлснә ветеран, медәт Мудункан Иваниг сәәнәр меднә. Олн җилдән эн Көтчнрә района бүрдәцст көдләд, залһлдана әңгин һардачин үүл дааһад, ачта амрлһндан һарсн болдг. Мөчн сарин 12-т Иван Дорджиевич 90 җилин өөнән темдглхмн.
Мудункан Ивана өвкнр дәәнә өмн Сарпан районд бәәсмн. Хар гөрәр киитн Сиврүр туугдсн хальмгудла хамдан Мудункаевихнә өрк-бүл Алтан крайд туссмн. Тенд Золотушка бичкн селәнд хальмг көвүн Ваня сурһульд орад, бичдг-умшдг дасв. Тууврт бәәсн хальмгудын үрд бичкнәсн авн көдлдг болв. Иван өрүн эрт босад, күүнә мал хәрүләд, өвс цуглулад, малын үвлин теҗәл белддмн.
Тәвдгч җилмүдт хальмгуд төрскн теегтән ирх зөв авад, таңһчан шинәс босххар шунв. Тиигхд Иван Дорджиевич өркән өндәлһәд, җолачар экләд көдлв. Көдлн бәәҗ техникумд инженер-механикин сурһуль төгсәһәд, дарунь «Сельхозхимия» бүрдәцин ах инженерин үүлд батлгдв. Хөөннь ирлцңгү бүрдәцд цаг зуур көдлҗәһәд, дарунь Көтчнрә (тиигхд Приозерн) района залһлдана әңгд көдлмшт орв. Мудункан Иван поштын әңгин көдлмш даавртаһар бүрдәһәд, чадмгар һарддг бәәсмн. Цаһан седклтә, тевчңгү, кен-негнләнь ээлтә һардач көдләч болһнд оньган өгч, нөкд болхар шундмн.
Олн җилдән үнн-чик седклтәһәр көдләд, ачта амрлһндан һарсна хөөн Иван Дорджиевич Элстд нүүҗ ирв. Энд хара суулго «СпецАТХ» бүрдәцд арвн тавн һар җилдән бас көдлв. Тер мет «Зултрһн» улсин ансамблин ханьд орад, таңһчин селәдәр йовад, билг-эрдмәрн олн-әмтиг байрлулсн болдг. Кесг җил хооран Мудункан Иван шүлгүд бичдг болв. Энүнә шүлгүдин түрүн хураңһу «Ханлт» гиҗ нерәдгднә. Шүлгүдтән бичкндк цагин зовлң, идр насна бәәдл-җирһл болн эндрк цагин тускар эн бичнә. Кесг шүлгүднь өсч-боссн төрскн Көтчнрә нутгтан эн нерәдв. Нег һазра нертә үүлдәчнр, малчнр, цеңкр уста булгуд энүнә төлә бахмҗ болдмн.
«Ааван хаалһдан гееләв», «Күүкнә седкл», «Цаһан Сар», «Ээҗдән», «Хальмг келән дасхмн» болн талдан шүлгүднь әмтнә оньг авлв.
БАДМИН Занда