Жюрин ханьд – нег һазра үүлдәч

Сегодня, 12:04 | Общество, Таңһчин зәңгс, Зіњг

Тууҗд орсн Ялтинск хургт болсн Ливадийск бәәшңд «Модные Агоны» гидг нертәһәр өдгә цага хувцна ик кемҗәтә наадм-хәләвр шидр давв. Шин кев-янзта хувц кеҗ һарһдг эрдмчнр цуг орн-нутгас цуглрҗ ирв. Манҗин Аркадин нертә Хальмг филармоня медлд үүлддг хальмг хувцна театрин художественн һардач Татьяна Милованова чинртә эн керг-үүлдврт орлцв.
Хальмг Таңһчин билг-эрдмин ачта үүлдәч һардҗадг театрин дөңгәр хальмг хувцнла, сойлла болн тууҗла таньлдҗадг әмтн эн билгтин үүлдвриг өөдәнәр үнлнә. Тер учрар эн ик чинртә наадмин жюрид Татьяна Милованова бас орсн болдг.
Шидр «Калмыкия» РИА-д болсн харһлтд Татьяна Милованова седкүлчнрт тер соньн керг-үүлдврин тускар келҗ өгв. Эндр Крымд гиигн болн бәәцин промышленностин төрмүдиг сойлын дөңгәр, тер тоод әмтнд таасгддг хувциг олн дунд тархаҗ хаһлҗахин тускар эн тодрхаһар цәәлһв.
Өдгә цага хувциг өргнәр үзүллһнә эн наадм йосндан ик чинртә йовдл болсинь Татьяна Алексеевна темдглв. Сойлын чинр зүүсн деерән өдгә цага хувцна хәләвр региона делгрлтд чигн туслв. Эн хәләвриг белдҗ давуллһнд Крымин йосна цуг бүрдәцс орлцсмн. Наадмд баһчудыг, сурһулин күүкд-көвүдиг орлцулснь бас тоолврта йовдл болв. Бәәрн һазрин онц арһлачнр, шин хувц ухалҗ һарһдг әмтн оларн орлцсн «төгрг ширән» сүүрин туск тоолврарн бас хувалцв.
Олн зүсн халхар эрдмтә улс белдлһнә, онц арһлачнрт дөң күрглһнә болн нань чигн бачм чинртә төрмүдәр күүндвр болв. Жюрин гешүдиг болн гиичнриг эн һазрин һәәхмҗтә ормст авч йовв. Бәәрн арсна фабрикд уйгдсн хувц-хунриг Татьяна Милованова үнлв. Өдгә цага некврлә ирлцүлҗ уйгдсн арсн хувцан эдн талдан орн-нутгудар йовулна. Наадм-марһан йир сәәнәр бүрдәгдсинь Татьяна Милованова онц темдглв.

ХӨӨЧИН Галина

Видео