Билгтә оютнр мөрәлгдв

Сегодня, 14:10 | Общество, Таңһчин зәңгс, Зіњг

Шидр Элстд Хальмг ик сурһулин седкүлчнрин әңгин оютнрт мөрәс бәрүлҗ өггдв. Таңһчин олна үүлдәчнр болн арһлачнр эн мөрәсиг эврә нерн деерәс буйнч седклин залмҗар үүдәв. Йилһән сәәнәр сурдг, олна үүлдврт шунмһаһар орлцдг оютнр тиим кевәр мөрәлгдҗәнә. Байрин керг-үүлдвриг эднә багш, Хальмг келнә болн дорд үзгин кел шинҗллһнә күрәлңгин утх-зокъялын болн седкүлчнрин эрдмин тиңкмин һардач, профессор Дәкин Раиса һардҗ, оютнрин тускар тодрхаһар келҗ өгв.
Эднәс кесгнь олн үртә өрк-бүлмүдт, селән һазрт өсч босла, сурн бәәҗ олнд зәңгллһнә эв-арһсин эс гиҗ шаңһа бүрдәцсин барин цергллтд көдлҗәнә. Күндтә улсин нер зүүҗәдг мөрәс хойр җил дарандан бәрүлҗ өггдҗәнә. 2-ч курсин оютн Анастасия Агибалова, 3-ч курсин оютнр Даяна Петрова, Есения Шевченко болн Чабана Байина, тер мет 4-ч курсин оютнр Максим Бондарев, Камкан Елизавета болн Утнасна Саглара мөрәс авв. Хальмг Таңһчас РФ-н сенатор Путян Байир, арһлач болн олна үүлдәч, адвокат Цохра Олег, Әрәсән седкүлчнрин ниицәнә гешүн Руслан Широков, Хальмг Таңһчин «Тооцана төв» гидг агентствин һардач, «Справедливая Россия» партин таңһчин әңгин ахлач Наталья Зинченко ачлвринь бәрүлҗ өгәд, улм өөдән күцәмҗ бәрҗ гүн медрл хоршаҗ Хальмг ик сурһулин нер туурулҗ, седкүлчин эрдмән сәәнәр күцәҗ йовтн гиҗ дурдв.
Таңһчин олна үүлдәчнрт тиңкмин һардач, профессор Дәкин Раиса ик ханлтан өргв.
ТҮРВӘН Һуна

Видео