Таңһчд хоршагдсн дамшлт гиичнриг соньмсулв

Сегодня, 14:17 | Общество, Таңһчин зәңгс, Зіњг

Шидр Хальмг Таңһчин Толһач Хаска Батун үрврәр Тульск мүҗин губернатор Дмитрий Миляевин һардврт ирсн делегац «Дәәч» гидг цергә болн спортын белдврин төвд, дәәнә ветеранмудын госпитальд, Б.Б.Городовиковин нертә Хальмг ик сурһульд, фиджитал-төвд одв.
Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлачин дарукс Шурһчин Очр болн Этән Алексей гиичнрлә хамдан эн бүрдәцст одад, теднә үүлдврлә таньлдулв. Әрәсән Баатр Лиҗин Мингияна нер зүүдг «Дәәч» гидг төвин һардач Җаңһан Чимид күндтә гиичнриг тосад, бичкдүдт болн баһчудт төрскнч сурһмҗ өглһнә, цергә белдврин керг-үүлдврмүдин тускар келҗ өгв. Эн бийнь эврә сән дурар цергә шишлң керг-үүлдврт орлцад, «Барс-4» багин ханьд дәәлдҗ йовсмн. Гиичнр цергә болн спортын белдврин төвин сурһулин хорас, энд олзлгдҗадг өдгә цага кергсл хәләв. Тульск мүҗин губернатор Дмитрий Миляев цергә белдврин төвд сурчадг күүкд-көвүдлә күүндв.
Дарунь гиичнр хотл балһсна 9-ч микрорайонд одахн секгдсн дәәнә ветеранмудын госпитальд одв. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, таңһчин эрүл-менд харлһна министрин дарук Сарңга Гиләш болн госпиталин һардач Модонкан Оксана дәәнә ветеранмуд болн медәтнр сән чинртә эмнлһ авхин төлә углҗ тәвгдсн өдгә цага кергсл, гүн шинҗллт келһнә шишлң әңгин хорас үзүлв. Гиичнр шин эмнлһнә үүлдврлә таньлдад, дәәнә ветернамудт болн медәтнрт сән таал тогтагдсиг темдглв.
Тер өдрин бийднь үдин хөөн күндтә гиичнр фиджитал-төвд одв. Хальмг Таңһчин Толһач Хаска Бату бийнь гиичнрт цугинь үзүләд, мини-футбол, стритбол нааддг талвңгудын, энд бәәдг компьютерн хорад өдгә цага эв-арһс олзлҗ, марһас давуллһна таал тогтагдсна тускар келҗ өгв. 2026 җилин чилгч күртл Тула балһснд бас иим төв тосхгдх болв, тегәд мана таңһчд секгдсн фиджитал-төв гиичнриг соньмсулв. Дмитрий Миляевин темдглсәр, иим өдгә цага төвмүд цергә шишлң керг-үүлдврт орлцачнрин эрүл-менд батруллһнд чигн өргнәр олзлгдх зөвтә. Тегәд Хальмг Таңһчин дамшлтыг эврәннь көдлмштән эрк биш олзлхвидн, гиҗ дааврта һардач темдглв.
«Агро-Тег» гидг агропромышленн паркд гиичнр селәнә эдл-ахун эдл-уушин, бәәрн арһлачнрин кегдлмүдин, олн зүсн эд-таврин һәәхүл хәләв. Хальмг Таңһчин Толһач Хаска Бату болн Тульск мүҗин губернатор Дмитрий Миляев арһлачнрла күүндәд, энд кеҗ һарһдг эдл-уушин чинринь үнлв. Гиичнр хальмг үкрә шимтә мах амсад һарв, бәәрн арһлачнр кесн арсн һосн-башмг, ке-сәәхн хувцн, олн зүсн кегдлмүд гиичнрт бас таасгдв. Агробизнес делгрүллһнә, бәәрн арһлачнриг дөңнлһнә туст таңһчд хоршагдсн дамшлт мадниг соньмсулв, тегәд терүг эврәннь региондан бас олзлхвидн, гиҗ Дмитрий Миляев иткүлв.
Б.Б.Городовиковин нертә Хальмг ик сурһульд одхларн гиичнр мал өсклһнә номин төвин үүлдврлә таньлдв. Ик сурһулин һардач Салан Бадм хальмг тохма малын, генетическ шинҗллтин лабораторин күцәмҗин тускар келҗ өгв. Тохма мал асрлһна керг делгрүллһнә төр Тульск мүҗин төлә ик чинртә болна, тегәд эн халхар мана таңһчла нөкцҗ көдлхәр бәәнә. Малын шимтә хот кеҗ һарһҗахин тускар ик сурһулин профессор Эвин Валерий цәәлһв.
Тульск мүҗин губернатор Дмитрий Миляевин келсәр, Хальмг Таңһчла нөкцлт батрулҗ, селәнә эдл-ахун, экономикин, сойлын болн зуульчллһна халхар хамцу үүлдвр делгрүлхәр зуралҗана. Тегәд эн йосна гиичллһн цуг халхарн олзта-туста болсиг эн темдглв.
ДООҖАН Наталья

Видео