Әрәсән Баатрин санл тевчв

Сегодня, 14:21 | Общество, Таңһчин зәңгс, Зіњг

Мөчн сарин 12-т Әрәсән Президент Владимир Путин Кремлин Бәәшңд цергә шишлң керг-үүлдврт орлцачнрла харһв. Владимир Владимирович эдниг Әрәсән сән Өдрлә йөрәһәд, эн байр эднә төлә чинртә өдр гиҗ темдглв.
Харһлтын йовудт Владимир Путин одахн цергә даалһвран күцәҗ йовад, әмнәсн хаһцсн хальмг дәәч, Әрәсән Баатр Очр-Һәрән Нарниг тодлв.
Цаһан седклтә, тевчңгү күн билә, гиҗ Владимир Владимирович тодлвран эклв. «Түрүн болҗ Очр-Һәрән Нарн Северск балһсиг сулдхад тооцаһан өгхләнь таньлдлав. Дарунь Москвад әәмшг уга бәәдл тогталһна Хүүвин селвлцәнд ирсн билә. Хөөннь «Шуд залһлданд» орлцхлань, орн-нутгин олн-әмтн энүнә тускар медв. Түрүн харһлтын йовудт ямаран төрмүд бәәхинь соньмсхла, медәтә экиннь эрүл-мендин бәәдлинь шинҗләд, нөкд болхинь эн сурв. Тиигхд би өврәд бәәвв, юңгад гихлә зуг йоста залу күн болад, бийиннь болн өрк-бүлиннь тускар келлго, хамгин түрүнд экиннь тускар ухалҗахан медүлв. Нарн Алексеевич олн үртә эцк болсн бийнь экиннь тускар зовҗаснь тодлгдв», – гиҗ Владимир Путин темдглв. Орн-нутгин Президент дәәчнрлә хамдан цаг зуур тагчг зогсад, Әрәсән Баатр Очр-Һәрән Нарна санлынь тевчв.
Хальмгин хәәртә үрн, зөргтә дәәч, ах лейтенант, командирин дарук, Әрәсән Баатр Очр-Һәрән Нарн цергә шишлң керг-үүлдвр эклснәс авн түрүн зергләнд дәәлдсн билә. Соледар болн Северск балһсдыг сулдхлһна догшин дәәлдәнд орлцад нерән туурулв.
Тер мет Әрәсән Президент Владимир Путинлә болсн харһлтын йовудт нег баахн дәәч Очр-Һәрән Нарна нер мөңкрүлхин туст седвәр орулв. Владимир Путин эн седвәриг дөңнәд, Очр-Һәрән Нарна болн талдан баатрмудын нердиг уульнцст, дунд сурһульмудт болн талдан бүрдәцст зүүлһх кергтә гив. Орн-нутгин һардвр эн төрин тускар ухалҗ, удл уга шиидврән һарһх, гиҗ Президент темдглсн болдг. Энүнә келсәр, дорас өсч йовдг үйнр орн-нутгин баатрмудыг медтхә гиһәд, ирлцңгү керг-үүлдврмүд эрк биш күцәгдхмн, гиҗ Владимир Владимирович товчлв.
ОЛЬДАН Цаһан

Видео