Хальмг хөөнә ноос хулдад

Хальмг Таңһчд хөөнә ноос эд-бод келһнә халхар болн энүг хулдхин туст ирлцңгү көдлмш күцәгдҗәнә. Эн төр Хальмгин Толһач Хаска Батун онц бүртклһнд даңгин бәәнә гиҗ темдглх кергтә.
2026 җилд таңһчин эдл-ахуст ут тоодан 2148,4 тонн хөөнә ноосн кирһҗ авгдв. Нег хөөнәс болхла дундлад һурвн килограмм цевр ноосн һарв. Тавн зун тонн иим ноосн даңгин хулдгдна.
Одахн Санкт-Петербург балһсна биржин талвңд 45 тонн торһн хальмг ноосн хулдгдв. Тенд ноос хулдхин төлә шин олн эв-арһс олзлдг болв, тер юңгад гихлә Әрәсән регионмудас болн талдан орн-нутгудас олн элчнр ирәд, ноос хулдҗ авна.
Темдглхәс, одахн Хальмг Таңһчин селәнә эдл-ахун министерствд зәңглсәр, өдгә цагт нөкцлтин йовудт хальмг торһн ноос Энткгин орн-нутгт йовулад хулдхин төлә ирлцңгү көдлмш давулгдҗана. Энүнә йовудт мана таңһчд дааврта бүрдәц секгдәд, таңһчин эдл-ахуст торһн ноос хулдҗ авад, цаарандан һазадын орн-нутгудт хулдгдх болв.
– Хальмг хөөнә торһн ноосн цуг делкәд сән чинртәд тоолгдна, тегәд нег һазра фермермүд ноос эд-бод келһнә көдлмшт онц оньган тусхах зөвтә. Эн җилд ноос эд-бод келһнд йилһгддг шаңһа демин мөңгн 2,5 холванд икдв. Мал өсклһн, селәнә эдл-ахун арһлачнр кеҗ һарһдг эдл-ууш болн талдан ирлцңгү көдлмш таңһчин һардврин бүртклһнд бәәһәд, экономикин делгрлтд туслҗахнь лавта, – гиҗ Хальмг Таңһчин селәнә эдл-ахун министр Гаван Тимур темдглсн болдг.
ОЛЬДАН Цаһан