Нег һазра баһчудтан нөкд болхар

Шидр Москва балһснд Хальмг Таңһчин элчллтд Әрәсән социальн болн Москва балһсна Залврин заллтын ик сурһульмудын элчнрлә харһлт болв.
Хальмг Таңһчин залврин Ахлачин дарук – Әрәсән Президентин медлд Хальмгин зөвтә элч Мучкинә Гернзл, РГСУ-н һардачин селвгч Константин Поздняков, Москва балһсна Залврин заллтын ик сурһулин багш Семен Гребеньков болн «Деловая Россия» ООО-н зуульчллһна комитетин гешүн Манҗин Зурһан терүнд орлцв.
Харһлтын йовудт сурһуль-эрдмин, зуульчллһна болн кадрмуд белдлһнә төрмүдәр нөкцлтин туст күүндвр болв.
Нег һазра улсиг Москвад көдлмшәр тетклһнә тускар харһлтд орлцачнр уданд күүндв. Балһсна эдл-ахун халхар сул көдлмшч ормсин тускар тодрхаһар Семен Гребеньков келв.
Хальмг Таңһчин элчллт нег һазра улсан даңгин дөңнәд, ямр чигн төрмүдт орлцхар шунна. Олн бүрдәцслә нөкцлтҗ, хамцу төсвсән күцәнә.
Тиим харһлтсин йовудт дамшлтарн хувалцад, тер мет нөкцлтин туст шин эв-арһс олҗ авгдна, гиҗ күүндврт орлцачнр темдглв.
БАДМИН Занда