Тосхлтын болн ясврин йовудыг бүрткв

Сегодня, 12:28 | Общество, Таңһчин зәңгс, Зіњг

Хальмг Таңһчин залврин Ахлач Босхмҗин Гилән Целинн районд одад, социальн дөрвн бүрдәцин тосхлтын болн бат ясврин йовудыг бүрткв.
Троицкое селәнд «Баһчуд болн бичкдүд» келн-улсин төсвин йовудт Партизанск дунд сурһульд бат ясвр күцәгдҗәнә. Тосхлтын бүрдәц көдлмшән цаг-болзгтан күцәҗәнә, өдр болһн тенд 40 күн көдлнә. Сурһулин шин җил эклтл бат ясвр төгсхмн, гиҗ зуралгдҗана.
Тер мет селәнд «Кадрмуд» келн-улсин төсв күцәлһнә йовудт көдлмшәр тетклһнә района төвд бас ясвр кегдҗәнә. Келхәс, эн бәәрн зун җил хооран эдлврт орсн бәәҗ. Тенд терзмүд, үүдд, электрокүчнә суңһуг сольгдв, ода болхла дотркнь ясгдҗана. Таңһчин залврт зәңглсәр, райодт бәәдг көдлмшәр тетклһнә цуг төвмүд шинрүлгдхмн. Эн туст хазнас 360 сай арслң йилһгдв. Төв селәнд тосхгдҗадг спортын бүрдәцин эрсмүднь болн орань босхгдв. Терүг 2027 җилд эдлврт орулхар зуралҗана.
Вознесеновка селәнд болхла сойлын Герт бат ясвр төгсхдән өөрдҗәнә. Тосхачнр эрсмүдинь батрулад, ораһинь, терзмүдинь болн үүдд сольв. Өдгә цагт һаза-дотак көдлмш кегдҗәнә. Намртан шинрүлгдсн бәәрн эдлврт орулгдхмн.
– Цуг көдлмш цаг-болзгтан кегдҗәхнь сән йовдл мөн. Дааврта улс болн ирлцңгү ведомствс тосхлтын болн бат ясврин йовудыг даңгин бүрткнә. Хальмгин Толһач Хаска Батун даалһсар, нег һазра улсин төлә сән таал тогтагдад, цугтаннь төлә сән бәәрнд көдлдг арһ учрхнь лавта, – гиҗ Гилән Герасимовна темдглв.

КАРСАНА Евгения

Видео