Хальмг эмчнрин ач-тусинь үнләд

Сегодня, 12:37 | Общество, Таңһчин зәңгс, Зіњг

Хальмг Таңһч болн Луганск Улсин Республикин Антрацитовск район хоорнд 2023 җилд батлгдсн нөкцлтин бооцана йовудт мана эмчнр дару-дарунь тиигәрән одад, бәәрн улсин эрүл-мендин бәәдл шинҗлнә. Таңһчин эмнлһнә бүрдәцсин мергҗлтнр долан дәкҗ тиигәрән одсмн. Эмчнр тенд бәәһәд, Антрацитовск района хол селәдт күрәд, дөң-тусан күргнә. Шидр хальмг эмчнрин баг дәкәд тиигәрән одад ирв.
Така сарин 20-әс авн 31 күртл нәәмн эмч ЛНР-ин Антрацитовск районд көдлв. Эдн района селәдин эмнлһст, медәтнрин гер-интернатд болн цергә госпитальд одад, әмтнә эрүл-мендин бәәдл шинҗлв. Эмчнрин хәләврт бөдүн улс болн бичкдүд орад, эмнлһнә болн эрүл-мендән батруллһна туст сүв-селвг авв. Маммограф углҗ тәвгдсн шишлң көлгн хол селәдт бас күрв, тегәд күүкд улс шинҗллт кеҗ чадв. Хальмг эмчнр ирсиг соңсад, бәәрн улс байрлад, мана мергҗлтнрт бийән үзүлхәр адһв. «Бидн тадниг даңгин күләнәвидн. Хальмгин эмчнр маднд дөң күргнә, эрүл-мендин бәәдл шинҗләд, эмнлһнә туст дарунь селвг өгнә. Мана таньл-үзл, элгн-садн эмчнрин дөңгәр эдгәд, эрүл-менд бәәнә. Мана тал ирҗәтн, мадниг бичә марттн. Луганск Улсин Республикин әмтнә нерн деерәс цаһан седклтә, килмҗтә, өөдән мергҗлттә эмчнрт ханлтан өргҗәнәвидн. Мана нөкцлт батрад йовтха», - гиҗ бәәрн улс эмчнриг тосад, ханлтын үгән нерәднә.
Түрүн һурвн өдр эмчнр Чернова Поляна, Бобриково болн Нижний Нагольчик селәдт одад, 300 шаху бөдүн улсиг болн 300 һар бичкниг хәләв. Хөөннь эдн Фащевка селәнд болн Антрацит балһснд көдлв. Хойр долан хонгин туршарт хальмг эмчнр ут тоодан күсдундур миңһн кү хәләһәд, шинҗллтин ашар эмнлһнә сүв-селвг өгв. Эмчнрт бийән үзүлсн улс дунд ямр нег гемнь түрүн болҗ илдкгдсн бәәнә, тегәд теднд немр шинҗллт кех болн эмнлһ эклх селвг өггдв. Зәрм улс дарунь эмнлһнә бүрдәцд йовулгдв, эдниг дарунь экләд эмнв. Нүднә, зүркнә, күүкд улсин эмчнр ирәд, дор-ормднь дөң күргсиг хол селәдт бәәдг улс өөдәнәр үнлв. Эдн маммографь болн ЭКГ шинҗллт кеһәд, мергҗлтнрин селвгәр кергтә эм хулдҗ авв. Урднь хальмг эмчнрт бийән үзүләд, ямр нег гем илдкгдснә хөөн эмнүлгдәд эдгсн улс ханлтан өргхәр чигн ирв. Нег үлү эдгсн бичкдүдин эк-эцкнр цаглань үрнднь гем илдкәд эмнснд ханлтан өргв.
Хальмг Таңһчин эрүл-менд харлһна министрин селвгч Батыра Зинаида эмчнрин багиг һардҗ йовсн билә. Келхд, Зинаида Сергеевна Луганск Улсин Республикд урднь кесг дәкҗ одад, таңһчин эмнлһнә бүрдәцсин көдләчнрин нерн деерәс цергә госпитальмудт кергтә тоот күргҗ өгсмн. Эн йовлһндан таңһчин эрүл-менд харлһна министерствин болн «Сулда» төвин көдләчнр цуглулсн эм, хот-хол госпитальд эмнүлгдҗәдг цергә шишлң керг-үүлдврт орлцачнрт күргҗ өгв. «Дәәчнрт бат эрүл-менд дурдҗанавидн. Шарх-шаван эдгәһәд, цергә даалһвран зөрмг кевәр күцәһәд, әмд-менд герүрн хәрҗ иртхә. Бидн эрк биш диилвр бәрхвидн», - гиҗ Зинаида Сергеевна келв.

ДООҖАН Наталья
ЗУРГТ: хальмг эмчнр
Антрацитовск районд көдлҗәх кем

Видео