Көдәрҗәдг һазрт олзлх урһмл

Сегодня, 12:37 | Общество, Таңһчин зәңгс, Зіњг

Одахн Хальмг Таңһчин залврин Ахлачин дарукин үүл дааҗадг Коҗан Санл таңһчин йиртмҗин көрңгин болн эргндк бәәдл харлһна министр Һооҗура Санл хойр Хальмг ик сурһулин «Шин тег» гидг номин-үүлдврин төвд одв. Эн төв Лаганя районд бәәнә, эврән тәрдг урһмл ик кемҗәтәһәр һарһҗ чадх гиҗ ик сурһулин һардач Салан Бадм цәәлһв. Җилдән энд хойр -һурвн болн терүнәс үлү сай урһмл урһаҗ болҗана.
«Шин тег» төвд техник болн урһмл услдг кергсл бәәнә. Тер мет төвин көдләчнрин төлә сән таалта, дамҗҗ йовдг бичкн гермүд тосхгдв, тегәд эдн эн җилин намрар теегт һарч, тәрәнә көдлмшән эклҗ чадҗана.
- Таңһчин залвр мана ик сурһульд хоршасн байн номин дамшлтыг өргнәр олзлхар седҗәнә. Селәнә эдл-ахун делгрлтин болн йиртмҗ харлһна, тер тоод малын идгүдин болн һазриг көдәрлһнәс гетллһнә төрмүдт һол оньган өгх зөвтәвидн. Тер мет урһа модта һазриг шинәс босхлһна төрмүд ода ик чинр зүүҗәнә. Эн нәрн төрмүдиг хаһлхин төлә бидн Хальмг ик сурһульла нөкцҗ үүлдҗәнәвидн. Орн-нутгин залвр «Шин тег» төвд дөңгән күргҗәнә. Тер мет таңһчин Толһач Хаска Бату болн мана залвр эн төрт һол оньган өгч, дөңгән күргҗәхнь темдгтә», - гиҗ таңһчин залврин Ахлачин дарукин үүл дааҗадг Коҗан Санл медүлв.
Эндр мана таңһчд элснд авгдсн һазрин кемҗән өсәд бәәнә. Хальмг ик сурһулин номтнр ик чинртә көдлмш кеҗ, селәнә эдл-ахун министерствин көтлвр күцәлһнд нилчән күргхнь лавта. Күцәх көдлмш баһ биш, энд фитомелиорацин төлә олзлх урһмл урһаҗана, тернь бас ик туста болхмн.
Хальмг ик сурһулин һардач Салан Бадмин келсәр, Хальмг Таңһчин ар үзгт бас тиим бүрдәц тогтах зура бәәнә. Ода таңһчд җил болһн 1450 гектар аһу һазрт модд урһагдҗана. Тер мет талдан регионмудын арһлачнр эн туст маднд нөкд болхар зуралҗана. Тиим кевәр иргчдән бидн модд урһалһна һазрин аһу икдүләд бәәхвидн гиҗ таңһчин йиртмҗин көрңгин болн эргндк бәәдл харлһна министр Һооҗура Санл келв.
- Хальмг ик сурһулин ирлцңгү бүрдәцд тавн сай мод урһаҗ болҗана. Эн җил элс зогсадг һурвн сай урһц урһахар бәәнәвидн, тер тоод торлг болн җүкн модна йисн зун урһмл белдхәр зуралҗанавидн. Тиим кевәр таңһчин залврин элчнр ик сурһулин бүрдәцд кесг сай урһмл урһаҗ болхиг медв. Эн җилин чилгчәр бидн урһмл тәрлһнә көдлмш эклҗ чадхвидн,- гиҗ «Шин тег» номин-үүлдврин төвин һардач Мацга Очр келв.
Тиим кевәр йиртмҗиг харлһна, элснд авгдсн һазрин кемҗәг баһруллһна ик чинртә кергт Хальмг ик сурһулин номтнр шунлттаһар орлцҗ, мана улсин җирһлин таал ясруллһнд туслхмн. Эднә седвәртә үүлдвр сән ашта болхнь лавта.

ТҮРВӘН Һуна

Видео