Лаганя района бүрдәцсиг бүрткәд

Сегодня, 13:00 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Ноха сарин 8-д Хальмг Таңһчин Толһач Хаска Бату Лаганя районд одад, тенд тосхгдҗадг болн ясгдҗадг бүрдәцсиг бүрткв. Залврин Ахлач Босхмҗин Гилән болн залврин гешүд терүнд бас орлцв.
Лаганя района толһач Коган Юрий күндтә гиичнриг тосч авв. Түрүләд гиичнр Улан Хол селәнд одад, тосхгдҗадг спортын талвң хәләв. Тенд ода әәмшг уга шишлң девскрәр бүркгдх болҗ һарв. Эннь селәнә улс седвәр татҗ, мөңг һарһҗ өглһнә көтлврин йовудт күцәгдҗәнә.
Тер мет селәнд «Шунмһа кевәр ут нас насллһн» келн-улсин төсв күцәлһнә йовудт шин бәәрн тосхгдхмн. Ода белдлһнә көдлмш кегдҗәнә. Балһснас хол бәәдг бийнь селәнә улс нааран ирәд, сән чинртә эмнлһ авч чадхмн.
Дарунь таңһчин һардврин элчнр Красинское селәнд тосхгдҗадг бәәр бас бүрткв. Тенд дунд сурһулин улд футбол болн волейбол нааддг спортын талвң тосхгдв. Эннь ут тоодан 450 дөрвлҗн метр аһу һазр эзлҗәнә. Удл уга көдлмш төгсәд, таңһчин Толһач Хаска Батун даалһсар тенд шам орулгдад, бичкдүд асхн ора күртл цаган сергмҗтәһәр давулҗ чадхмн.
Тендәс һарад, күндтә гиичнр селәнә шинрүлгдсн Диилврин паркд одв. Хамгин түрүнд Хаска Бату болн Босхмҗин Гилән Төрскән харсгч Алдр дәәнд әмнәсн хаһцсн дәәчнрин санлынь тевчәд, бумбд цецгүд тәвв. Ирлцңгү келн-улсин төсвин йовудт эн парк ясгдв. Красинское селәнә муниципальн бүрдәцин толһач Сарңга Владимирин келсәр, паркд медәтнр чигн, баһчуд чигн өдр болһн ирәд амрна. Сурһулян төгсәһәд, баһчуд төрскн селәндән ирҗәхиг бас темдглх кергтә. Һазр-усан делгрүлхәр седҗәдг баһчуд баһ биш, эн йовдл мадниг улм урмдулҗ, селәндән сән кец-таал тогтахиг шунмһадулна, гиҗ Владимир Анатольевич ухан-тоолврарн хувалцв.
Лагань балһснд болхла Әрәсән Баатр Лиҗин Мингияна нертә олн салврта гимназьд бат ясвр яһҗ күцәгдҗәхинь гиичнр хәләв. «Баһчуд болн бичкдүд» шаңһа төсвин йовудт эн бат ясвр кегдҗәнә. Гимназь сурһулин ирлцңгү шин кергсләр бас теткгдхмн.
Удл уга Лаганьд Ноһан Дәркин парк секгдх. Паркин һазринь хәләһәд, Бату Сергеевич ирлцңгү даалһвр өгв. Эн парк нег һазра улсин төлә бәәтхә мана таңһчд ирдг зуульчнриг бас соньмсулх зөвтә.
Эндр Хальмгт хаалһс тосхгдҗахиг, сурһульмуд шинрүлгдҗәхиг болн талдан чинртә көдлмш кегдҗәхинь Хаска Бату онц темдглв. Эн җил Көк теңгсин көвәд бәәдг Лагань балһсн 155 җилин ончта өөнән темдглхмн, тегәд балһсн өсәд-өргҗәд, энд бәәдг улс төрскн һазран цаарандан делгрүләд йовхнь лавта, гиҗ Хаска Бату бат итклтә бәәхән медүлв.

Видео