Төрскн келнә багшнр дамшлтарн хувалцв

Сегодня, 13:25 | Общество, Таңһчин зәңгс, Зіњг, Сурєуль-эрдм

Эндр төрскн келән, тууҗан, авъясан дасч авлһн баһчудт төрскнч сурһмҗ өглһнә халхар нилчән күргҗәнә. Орн-нутгин һардвр ода цергә керг-үүлдвр болҗадг кемд ирлцңгү кергт ик оньган тусхаҗана. Ноха сарин 3-ас авн 12 күртл Забайкальск крайин Агинск - Бурятск дуһргд төрскн келнә багшнр цуглрҗ дамшлтарн хувалцснь темдгтә йовдл болв.
Хальмг Таңһчин, Бурятин болн Забайкальск крайин Агинск-Бурятск дуһргин багшнр көдлмштән олзлдг эв-арһсин тускар өргн күүндвр кев. «Өдгә цагин сурһуль-эрдмин аһуд төрскн кел дасхлһна болн этносойлын үнтә тоотыг тархалһн» гидг төрәр мергҗлтнр селвлцв. Ноха сарин 3-д Агинск-Бурятск дуһргин Могойтуй селәнә 1-ч тойгта дунд сурһульд эн харһлтыг байрин бәәдлд секв. Забайкальск крайин социальн көдләчнрин мергҗлт өөдлүллһнә Агинск күрәлңгин һардач Е. Намҗла сурһуль-эрдмин хамцу керг тогталһн өдгә цагин ик чинртә йовдл болҗана, терүнә дөңгәр төрскн кел даслһна кесг эв-арһ олзлгдҗана, келн-улсин сойлын зөөр шинҗллһнд болн делгрүллһнд ик нилчән күргҗәнә гиҗ темдглв.
Хальмг делегацин ханьд хальмг келәр сурһуль-эрдмин көтлвр күцәҗәдг багшнр болн сурһмҗлачнр, тер мет Хальмг Таңһчин сурһуль-эрдмин министерствин элчнр тиигәрән йовв. Министерствин әңгин һардач Увшин Зоя, Хальмг Таңһчин делегацин талдан чигн элчнр илдкл кеҗ олна оньг авлв. Хальмг келнә кичәлд тууль келҗ өгәд, наадна эв-арһ яһҗ олзлҗахин тускар Элстин 24-ч тойгта садын төрскн келнә багш Балакан Екатерина цәәлһвр өгв. Яшкулин района Улан-Эрг селәнә дунд сурһулин хальмг келнә багш Долган Байр кичәлин йовудт даслурин болн наадна тоотыг олзлдгин туск дамшлтарн хувалцв.
«Забайкальск крайд һурвн региона багшнрин харһлтд орлцсн йовдл маднд бахмҗ үүдәв. Мана сурһулин элч Цугәрәсән марһанд орлцҗ йилһән сән 15 багшин тоод орсмн. Тиим харһлт хальмг болн бурят келнә делгрлтд туслхнь лавта. Семинарин хөөн хальмг багшнр Моңһл орн-нутгур йовҗ, теднә тууҗла болн сойлла таньлдхар седҗәнә. Тиигәд мана мергҗлтнр сәәнәр амрсн деерән теднә көдлмшт туслх кесг тоотыг медҗ авх», - гиҗ Улан Эрг селәнә сурһулин һардач Бембин Делгр келнә.
Цааранднь регионмуд хоорндк семинар Забайкальск крайин Агинск-Бурятск дуһргин Дульдургинск муниципальн дуһргд көдлмшән давулв. Хальмг Таңһчин, Бурятин болн Агинск-Бурятск дуһргин делегацсин элчнр Таптанайск дунд сурһульд болн бичкдүдин садт, Дульдургинск 2-ч тойгта дунд сурһульд одв. Энд багшнр төрскн кел дасхлһна дамшлтарн хувалцв.
Хальмг Таңһчин багшнр шагшавдын сурһмҗ өглһнә, тод бичг дасхлһна кичәлмүдин тускар келҗ өгв. Тод бичгәр давулсн кичәл, хальмг улсин цәәһин авъяс олыг соньмсулв.
Тер мет Агинск-Бурятск дуһргин багшнрин «Этноград» гидг төсвнь олна оньг авлв, тер мет шинҗллтин көдлмш бүрдәлһнә дамшлт бас соньн болҗ медгдв.
Тиим кевәр эн харһлт һурвн региона хоорндк иньгллт батруллһнд нилчән күргснь лавта болв. Эн нөкцлт 2024 җиләс авн делгрҗәнә.
Бурят болн хальмг улсин келн учр-утхарн өөрхн болҗана, тегәд төрскн кел хадһллһнд эн нөкцлт цааранднь чигн тусан күргәд бәәхнь лавта.
ТҮРВӘН Һуна

Видео