Хальмг тег болн гөрәсд - зургудт

Сегодня, 12:54 | Общество, Таңһчин зәңгс, Зіњг, Сойл

Хар Һазрин өвәрц бәәдл зургт буулһҗ авхар кедү күн Хальмгт ирнә. Орн-нутгин өмн үзгт бәәдг «Хар һазр» заповедникд гөрәсдәс нань олн аң-аһрусд харҗ хәләгднә. Заповедникин көдләчнрин килмҗтә хәләврт сүл цагт гөрәснә то зөвәр өсв. Энд хәләврт бәәҗ, шишлң төөлгәр темдглгдсн хальмг һәрд Энткгин һазрт күрсинь ода кен эс меднә. Энткгин әмтнлә залһлдан батрх гисн темдг болҗ тер йовдл ода сангдна. Терүнә дару Хальмгт Энткгин сойлын Өдрмүд байрин бәәдлд болв. Хамцу нань чигн керг-үүлдврмүд күцәгдх гиҗ зуралгдҗана.
«Хар һазр» гидг заповедникиг таңһчд бәәтхә цуг Әрәсәд әмтн сән меднә, ода Москвад болҗадг соньн һәәхүлд эврә зургудан үзүлҗәнә.
Москва хотл балһсна тууҗлгч бәәрнд Воронцовск паркд аһу ик кемҗәтә зургудын һәәхүл секгдв. «Теегин әмсхл: Әрәсән заповедникүдин тууҗ» гидг нертә ик төсв олн улсин оньг авлҗана. Орн-нутгин хамгин сән зург цокачнрин зургудыг эн ик һәәхүлд үзҗ болхмн.
Москван әмтн болн хотл балһсна гиичнр һәәхүлд ирәд, эң-зах уга өргн теегин бәәдллә, эн һазрин урһмлла, теегин аһуд бәәршсн җивртнрлә, аңгудла таньлдна.
«Хар һазр» шаңһа йиртмҗин заповедник һәәхүлин күндтә гиич болв.
Нернь олнд темдгтә зург цокачнр Яков Оскановин, Петр Воротниковин болн Виктор Тяхтин зургудт тодлгдсн хальмг теегин җирһл әмтиг икәр соньмсулв. Билгтә зургчнрин үүдәврмүдт теегин йиртмҗин бәәдл өвәрц кевәр үзүлгдҗ, нааран ирх седкл зүүлһнә. Теегин һол темдг болсн гөрәсд ик кезәнәс авн бәәдг аң болҗана. Йиртмҗд бәәдг цуг ховр болн өвәрц тоотыг әрүнәр хадһлҗ, килмҗән һарһҗ үүлдхин тускар һәәхүл олн-әмтнд медүлҗәнә. Әрәсән ик нутгин йиртмҗин зөөр болҗадг тоотыг әрүнәр хадһлҗ олзлхин тускар һәәхүлд ирлцңгү дуудвр кегдҗәдг болв.

Видео