Шаҗна һурвн эрдньд нерәдсн көгҗмин белг

Сегодня, 11:52 | Общество, Таңһчин зәңгс, Зіњг, Сойл

Тыван Кызыл хотл балһснд болсн шаҗна үүлдәчнрин нарт-делкән ик хург бүрдәмҗин сән таалд давв. Чинртә эн йовдл улсин сойлын болн шаҗна хоорндк залһлдана үүдәгч күчинь дәкн нег медүлв.
Делкән кесг һазрас болн Әрәсән регионмудас ирсн гиичнр бурхн-шаҗн эвин кергт туслҗадг урмдулгч чинрин тускар болсн күүндврмүдт орлцв.
Ноха сарин 19-д болхла өрүн «Тубтен Шедруб Линг» хурлын өөр бурхн-шаҗна һурвн эрдньд көгҗмин белгән нерәдсн сәәхн үүлдвр болв. Хальмгин, Бурятин болн Тыван үүдәгч коллективс дууна болн көгҗмин дөңгәр билг-эрдмин дееҗд нерәдәд, улсин хоорндк үүдәгч залһлдан тасршго бат болҗахиг медүлв.
Нарт-делкән дөрвдгч хургин кемҗәнд болсн көгҗмин эн үүлдвриг Тыван келн-улсин оркестр бүрдәсмн. Эн төсвин режиссер Тыва Республикин улсин хоомейжи Эртине Тумат, сценарист болҗ Тыван ачта артист Орлан Монгуш үүлдв.
Көгҗмин үүлдврин эклцәр Тыва Республикин Толһач Владислав Ховалыгин нерн деерәс залврин ахлачин дарук Орлан Сарыглар цуглрсн улсиг чинртә эн йовдлла йөрәв. «Көгҗм – улс хоорндк залһлдаг батлдг онц янз болҗана. Бурхн-шаҗна авъясар болхла, күн болһн көгҗмин дөңгәр седкл-ухаһан деедс бурхдт күргдг әрүн янз болна. Көгҗмин белгән шаҗна һурвн эрдньд нерәдлһн энтн мана келн-улсин эвин, ни-негн бәәдлин болн оюни авъясмудын темдг болҗ улсин уханд тодлгдх», гиҗ Сарыглар темдглв.
Тыван шаҗна үүлдәчнрин оюни һардач Гевш Гелонг Лоден Шераб багш йөрәлин үг келҗ, көгҗмин үүлдврт цаһан хаалһ дурдв.
Тер һазра Келн-улсин көгҗмин зевсгүдин хамцу оркестр болн дууна коллектив Ноһан Дәркд көгҗмән болн дууһан нерәдв. Әрәсән ачта артистк, Тыва Республикин улсин артистк Айдысмаа Көшкендей эн ду өөдән өргҗ, дуучнриг дахулв.
Терүнә дару Әрәсән шар шаҗнд шүтдг улсин частр күңкнв. Әрәсән регионмудын көгҗмин эрдмчнр көгҗмин белгән шаҗна һурвн эрдньд нерәдв.
Хальмг Таңһчин билг-эрдмин ачта үүлдәч Катан Саврин һардврт мана артистнр Манҗин Аркадин «Ноһан Дәрк» гидг үүдәвриг шаҗна һурвн эрдньд нерәдв. «Грэмми» мөрә шүүҗ авсн «Алаш» гидг Тыван багиг әмтн байртаһар тосв. Деед болн Дорд үзгин көгҗмин авъясмудыг үүдәвртән негдүлҗ чадсн эн багиг Тывад бәәтхә талдан һазрт чигн әмтн сәәнәр меднә. Тыван улсин артистк Сайын Хоо Намчылак эн өдр цуглрсн улсиг бас байрлулв.
Бурять Республикин үүдәвр «Минии Буряадай найр» гиҗ нерәдгдв. Мунко Дондоков терүг дуулв. Бурятин билг-эрдмин ачта үүлдәч Жаргал Токтонов ирлцңгү үүлдвриг һардв.
Тыван келн-улсин зевсгүдин хамцу оркестр болн дууна коллектив «Сыгыт хөөмей» («Эне Сай») болн «Доруг Дайым» гидг үүдәврмүдиг күцәҗ көгҗмин белгин байриг төгсәв.
«Нарт-делкән дөрвдгч ик хургин йовудт билг-эрдмән үзүлвидн. Хальмгин, Бурятин артистнрлә болн көгҗмчнрлә хамдан көгҗмин дееҗ өргсн йовдл ончта болв. Көгҗмин эн үүлдвр цугтаднь таасгдснь байрта йовдл мөн», – гиҗ Тыван филармоня һардач Эртине Тумат эн йовдлыг үнлв.

ҖИРҺЛИН Кермн

Видео