Бичкдүдиг сурһульд белдв

Сегодня, 13:48 | Общество, Таңһчин зәңгс, Зіњг, Сурєуль-эрдм

Таңһчин әмтнә социальн теткврин төвин улд үүлддг өрк-бүлмүдиг дөңнлһнә әңг җил болһн олн үртә, баһ тетквртә, цергә шишлң керг-үүлдврт орцлачнрин өрк-бүлмүдин төлә «Сурһуль, менд!» гидг буйнч седклин олна керг бүрдәнә. Эн керг «Эврә сән дурар үүлддг улс -бичкдүдт» гидг Әрәсән керг-үүлдврин йовудт болна. Таңһчин бүрдәцсин көдләчнр, арһлачнр, депутатнр күүкд-көвүдиг сурһулин эд-таврар теткәд, өрк-бүлмүдт дөң-нөкд болна.
Хальмг Таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян бичкдүдиг йөрәһәд, сурһулян сәәнәр сурад, багшнран соңсад, кесг үүрмүдтә болхиг дурдв. Мингиян Владимирович эврәннь нерн деерәс Дорҗин Миланад дорва бәрүлҗ өгв, наадк күүкдт болхла сурһулин хувц-хунр белглв.
Хальмг Таңһчин Деед зарһин, Элст балһсна зарһин, Әрәсән мөшклһнә комитетин Хальмг Таңһчд үүлддг заллтын, КПРФ-ин таңһчд үүлддг әңгин элчнр бичкдүдиг бас йөрәхәр ирв. Келхд, эн бүрдәцсин көдләчнр җил болһн эн керг-үүлдврт орлцҗ, олн үртә, баһ тетквртә өрк-бүлмүдт дөңгән күргнә.
Долан үртә эк Сохра Александран Эвелина күүкнь эн җил 1-ч класст орхмн. Күүкн талдан бичкдүдлә хамдан «Бичкн сувсн» әңгд орад, сурһульд белдв. Бичкдүд то-үзг дасад, олн зүсн кегдлмүд кеһәд, зургуд зурад, цаган соньнар болн тустаһар давулсн болв. Олн үртә экин келсәр, эднә өрк-бүлд дөрвн сурһульч бәәнә. Өрк-бүлмүдиг дөңнлһнә әңгин көдләчнр бичкдүдин билг-эрдм делгрүллһнә халхар кесг керг-үүлдвр давулна, сурһулин хувц-хунр эд-тавр хулдҗ өгнә. Эвелина күүкнь балһсна 10-ч тойгта сурһульд орхмн, тенд ахнрнь бас сурчана. Өрк-бүл болһнд килмҗән тусхаҗ, дөң-тусан күргдг төләднь күүкд күн ик ханлтан өргв. Мемән Бибигуль болхла арвн үртә эк болна. Тавн үрнь хотл балһсна 4-ч тойгта дунд сурһульд сурна. Цугтаднь хувц-хунр, башмг, девтр, нань чигн эд-тавр хулдҗ авхд баһ биш мөңгн һарһгдна гиҗ олн үртә эк зовлңшна. Әмтнә социальн теткврин төвин көдләчнр сурһульд күүкдән белдхд дөң-нөкд болдг деерән олн үртә өрк-бүлмүдин орлцлһта марһас давулна, психологуд бачм төрәр сүв-селвг өгнә гиҗ баахн эк темдглв.
Таңһчин әмтнә социальн теткврин төвин һардачин дарук Хинән Светлана буйнч седклин керг-үүлдврт орлцад, демән күргсн улсин ач-тусинь өөдәнәр үнлв. Эн җил «Эврә сән дурар үүлддг улс-бичкдүдт» гидг Әрәсән керг-үүлдврин йовудт 88 сурһульчд дөң күргв, эднәс 15 күүкн-көвүн 1-ч класст орҗана. Бичкдүд шүлгүд айслулҗ умшад, билг-эрдмәрн цугтаһинь байрлулв.
БАТАН Сәәхлә
ЗУРГТ: күндтә гиичнр 1-ч класст орҗадг бичкдүдиг йөрәв

Видео