Улсин көтлвр батлгдв

Сегодня, 11:33 | Политика, Общество, Таңһчин зәңгс, Хальмг Тањєчин Толєачин ґдр-бўр, Зіњг

Шидр Москва балһснд «Негдсн Әрәсә» партин XXIII чуулһн болв. Әрәсән Президент Владимир Путин чуулһнд орлцснь темдгтә болв. Әрәсән тугин Өдрлә болсн хургт орлцачнриг орн-нутгин толһач йөрәһәд, бидн мана тугин, Төрскнә төлә дәәлдәд, орн-нутгиннь үлмә уга бәәдлиг харсхвидн гив. «Эндр Әрәсән туг цергә шишлң керг-үүлдврин йовудт сулдхгдсн балһсдт болн селәдт делсчәнә. Әрәсән туг энтн орн-нутгин тууҗ, Төрскнә бахмҗ болн олн улсин ниицлт мөн» гиҗ Владимир Владимирович темдглсн болдг.
Хальмг Таңһчин Толһач Хаска Бату чуулһнд орлцад, партин гешүд Улсин көтлвр батлсиг темдгләд, нег һазра улс терүг тогталһнд шунмһаһар орлцҗ, сүв-селвгән орулснд ханлтан өргв. Шинрүлгдсн көтлврт орн-нутгин әмтн 3,5 сай сүв-селвг ор улсн болв. Әрәсән Президент Улсин көтлвриг өөдәнәр үнләд, терүг әмтн бийснь тогтаснь ик чинр зүүҗәнә гив. Улсин көтлврт бичкдүдиг асрҗадг өрк-бүлмүдиг, цергә шишлң керг-үүлдврт орлцачнриг болн теднә өрк-бүлмүдин гешүдиг дөңнлһнә, сурһуль-эрдмин, эмнлһнә бүрдәцст бат ясвр келһнә болн өдгә цага кергсләр тетклһнә, балһсдт болн селәдт сән кец-таал тогталһна төрмүд һоллгч орм эзлҗәнә. Хаска Батун темдглсәр, Хальмг Таңһч урдк көтлврин цуг зөрүллтсиг күцәмҗтәһәр бәәдл-җирһлд тохрасн билә, тегәд шинрүлгдсн көтлврт өөрхн тавн җилин эргцд күцәгдх керг-үүлдврмүдт бас ик оньг өггдх болв.
- Иргнмүдин ниицлтин болн орн-нутгин иргчин төлә хамдан көдлхвидн. Әрәсән Президентин темдглсәр, ода мана ниицл салдсмудын болн офицермүдин залу-зөрмг бәәдл, Диилврин төлә ач-тусан күргх седклтәһәр көдлҗәдг күн болһн орн-нутгин сарул-сәәхн иргчин бәәдлд туслх зөвтә. Мана күчн олна ниицлтд, Әрәсән цецгәрлт мана күсл мөн, гиҗ Бату Сергеевич темдглв.

Мана зәңгч

Видео