Сурһулин шин җил күцәмҗтә болтха!

Сегодня, 12:56 | Общество, Таңһчин зәңгс, Зіњг, Сурєуль-эрдм

Зуни амрлһн төгсәд, кесг миңһн күүкн-көвүн лагерьмүдт сергмҗтәһәр амрад,сурһулин шин җилд белдв. Негдгч класст орҗадг бичкдүдин болн эднә эк-эцкнрин төлә ик чинртә өдр болҗана. 2026-2027 сурһулин җилд 3000 шаху сурһульч медрлин хаалһдан орхмн.
Элст балһсна 17-ч тойгта Көглтин Даван нертә дунд сурһульд 120 һар сурһульч 1-ч класст орв. «Би 1-ч «А» класс һардҗанав, Хальмг ик сурһуль төгсәснә хөөн 9 җилдән энд көдлҗәнәв. Мини күүкд цугтан шин җилд белн бәәнә, эднд шин дорва белглв, дотрнь сурһульднь кергтә тоот бәәнә», - гиҗ эклц классин багш Ирина Болданникова келнә. Босхмҗин Давид (зургт) 17-ч тойгта дунд сурһулин 1- ч класст орв. Эн сурһулян сәәнәр сурад, билг-эрдмән делгрүлх саната.
Сурһулин шин җилин өмн өргнд таңһчин райодын сурһулин 21 герт бат ясвр кегдв. Сурһульчнр болн багшнр һаха сарин 1-д шинрүлгдсн гермүдт ирснь ик байрта йовдл болв. Дарук 2027 җилд дәкәд арвн сурһульд бат ясвр кегдх. Таңһчд шин сурһульмуд тосхгдҗана, таңһчин Толһач Хаска Батун онц бүртклһнә таалд эн төр хаһлгдҗана.
Сурһулин шин җилд кесг шинрлтс орулгдҗана. Тиигәд, 5-7-ч классмудын төлә «Төрскн һазрин тууҗ. Хальмг Таңһч» гидг нертә даслур һарв гиҗ зәңглгдв. Әрәсән гегән-герлин Министерствин селвгәр эн шин дегтр барлгдв. Ода сурһульчнр эврә даслур олзлҗ Хальмг Таңһчин тууҗиг дасх, тернь төрскнч сурһмҗд ик чинр зүүҗәнә.
Таңһчин сурһульчнр сурһулян сәәнәр сурад, билг-эрдмән делгрүлҗ ик күцәмҗ бәрнә. Терүг шаңһа шүүврин аш иткүлҗәнә. Келхд, 2026 җилин то-дигәр, 36 арвт шүүврин ашар 100 балл хоршаснь бахмҗта болв.
ТҮРВӘН Һуна

Видео