Чинртә төрмүдәр болсн күүндвр

Сегодня, 13:12 | Общество, Таңһчин зәңгс, Зіњг, Сойл

Хальмг Таңһчин сойлын болн зуульчллһна министр Бембин Евгений «Өөрднр» бииһин театрин художественн һардач, Хальмгин Баатр Нәдвдә Петрла харһҗ күүндв. Хальмгин бииһин театрин иргчин туск тохнята күүндвр болв.
Хальмгин сойлын ачта үүлдәчлә болсн күүндврт өвкнрин сойлын зөөриг хадһллһна болн делгрүллһнә төрәр эдн ухан-тоолврарн хувалцв. Сойлын таалыг цагин йовудла ирлцүлҗ делгрүллһнә төрт оньган тусхав.
«Хальмг сойлын әмд герчнь болгч үүлдәчлә кесн күүндвр» гиҗ Нәдвдә Петрла болсн харһлтыг министр үнлв. Үүдәгч үүлдврин кесг арвн җилин туршарт Петр Тимофеевич эврәннь коллективән өскәд-өргҗүләд, хальмгудын тууҗ болн сойлын зөөр бииһин дөңгәр хадһлгдҗадг соньн театрт хүврәҗ чадв.
«Сойл төрскн келн угаһар делгрҗ чадшго» – гиҗ Петр Тимофеевич даңгин давтҗ келнә. Баһчуд эврәннь уңг-тохман медх зөвтә гиҗ эн шунна.
«Энүнә театрин белдсн наадд – энтн хальмг улсин тууҗин йоста үнн келврмүд мөн. Әрәсән олн келн-улсин бүлд ниитәһәр бәәдг хальмг улсин сойлыг болн авъясмудыг олн-әмтнд медүлҗ үзүлдг театр болҗана», – гиҗ театрин үүлдвриг Бембин Евгений үнлв.
«Өөрднр» бииһин театрин бәәршлҗәдг герин ясврин туск төр чигн бас босхгдв. Сойлын делгрлтин көтлврт келән, авъясмудан хадһлх төрмүд һол оньгт бәәнә.
Нәдвдә Петр белдҗ тәвсн «Друг степей калмык» гидг балетас авн «Великий шелковый путь» гидг ик наадн күртл – цуг эн өвәрц үүдәврмүд келн-улсин сойлын зөөриг өдгә цага янзла эвинь олҗ ниицүлҗ чадсна йоста сән үлгүрмүд болҗана.
Министрлә болсн күүндвртән Петр Тимофеевич моңһл келтнрлә бәрҗәдг залһлданд оньган тусхав. Хальмгт моңһлчуд өргнәр орлцсн ик хургуд хая биш болдгнь темдглгдв. Нарт-делкән кемҗәнд болдг тер хургудт сойлын төрмүдәс нань бурхн-шаҗна залһлдана төрмүдәр күүндврмүд болна. Гүн номин шинҗллтин, спортын, утх-зокъялын халхар, баһчудын хоорндк залһлда батллһна туст хамцу төсвс күцәгдҗәнә. Моңһлын, Бурятин, Тыван, Алтан элчнрлә харһлтс болн хамцу керг-үүлдврмүд күцәлһн йирини авъяст тохрв. Өдгә цагин бәәдлд улсин хоорндк залһлдан батрҗана.
Хальмгин сойлын таалыг делгрүллһнә, коллективин гастрольн хаалһсиг өргҗүллһнә болн моңһл келтнрин сойлын залһлдана төрмүдәр цааранднь чигн харһҗ күүндҗәхин тускар эдн үгцв.

УШКАНА Сувсн

Видео