Чиңһс хаана цагин тускар

Сегодня, 13:13 | Общество, Таңһчин зәңгс, Зіњг, Сойл

Зуни амрлһна хөөн хальмг театрмуд көдлмшән эклв. Басңга Баатрин нертә Келн-улсин театр йирн җилә өөнән темдглхмн. Өөнин җилд олн хәләһәчнртән шин наадд үзүлхәр театрин коллектив белдҗәнә. Эн селгәнд үзүлгдх нег наадыг нертә режиссер Андрей Борисов белдҗәнә.

Әрәсән улсин артист, шаңһа мөрәсәр ачлгдсн, Якутяс ирсн режиссер Андрей Борисовиг Хальмгин болн Әрәсән театрин үүлдәчнр сәәнәр меднә. Якутин артистнр болн режиссер Андрей Борисов Хальмгт урднь ирсинь мана хәләһәчнр тодлна.
Келн-улсин театрин тәәз деер нертә режиссер «Смерть князя Джамуги» гидг наад белдҗ тәвҗәнә. Лев Гумилевин үүдәврәр бичгдсн наадн хәләһәчнрин оньг авлхнь маһд уга. Чиңһс хаана бәәдл-җирһләр соньмсдг әмтн Джамуган нериг сәәнәр меднә. Тегәд наадыг хулһн сард хәләһәчнр үзҗ чадхмн.
«Золотая маска» мөрәһәр ачлгдсн Андрей Борисов Якутин театрин делгрүллһнә халхар ик көдлмш кесн үүлдәч болҗана. Якут келн-улсин сойлыг өргҗ, делгрлтин хаалһд оруллһнд сойлын министр болҗ олн җил көдлсн цагтан Андрей Борисов зөвтә ач-тусан күргсмн. Тегәд Хальмг театрт нертә иим режиссер наад белдҗ тәвҗәхнь ик чинртә йовдл болҗана.
Келхәс, Андрей Саввич дуулврин болн билг-эрдмин Арктическ төвин һардачар үүлднә. Әрәсән Президент Владимир Путин олн җилә сән ашта үүлдвринь темдгләд, онц ач-тусинь үнләд, Әрәсән Күч-көлснә Баатрин нер энүнд зүүлһсн болдг.
Ода эн нааднд орлцҗадг артистнр билг-эрдмин халхар сән дамшлт авчана. Андрей Борисов наад тәвлһнд һавшун эрдмч болсн деерән әмтнд медрл заадг болн дамшлтарн хувалцдг билгтә күн болҗана. Наад белдсн цагтан артистнрин чадмгиг, билгин, авцинь үзүлҗ чадна. Дүрин бәәдлиг хәләһәчнрт медүлхәр артист нертә режиссерин һардврт ик көдлмш кенә. Нег сәнь иим хамцу көдлмшин ашнь хәләһәчнрт таасгдна. Юнгад иим наадыг шүүҗ авсмб гиҗ соньмсхла, йириндән тууҗин цаг, тер дотр 13-ч зун җилин цаг, Чиңһс хан «делкәг догдлулҗасн» цаг энүг соньмсулдгин тускар Андрей Борисов келнә. Талдан театрмудт өөрднрин туск наад тәвх санан бәәхиг чигн нертә режиссер медүлв.

ҖИРҺЛИН Кермн
Зургт: режиссер
Андрей Борисов

Видео