Нег һазра дәәчнрин үлгүрәр

Сегодня, 13:33 | Общество, Таңһчин зәңгс, Зіњг, Сурєуль-эрдм

Урҗ өдр Хальмг Таңһчин сурһуль-эрдмин бүрдәцст медрлин Өдрт нерәдсн байрин керг-үүлдврмүд болв. Эн җил мана таңһчд һурвн миңһн шаху көвүн-күүкнә төлә сурһулин шин җил эклв.
Хальмг Таңһчин залврин Ахлач Босхмҗин Гилән, Элст балһсна Хургин депутат Хаска Аюка, цергә шишлң керг-үүлдврт орлцач, эн гимназиг төгсәсн Манҗин Эрнцн болн талдан гиичнр Элст балһсна олн салврта гимназьд болсн байрт ирв (зургт).
Элстин олн салврта гимназин һардач Саман Елена нүр үг келҗ, байрин нәәриг эклсн болдг:
«Хамгин түрүнд мана гимназьд орҗ ирсн негдгч классмудын сурһульчнриг йөрәҗәнәвидн. Тадна төлә дааврта кем эклҗәнә. Тер мет 9-11-ч классмудын арвтнрин төлә бас сурһулин җил чинртә болҗана, юңгад гихлә, эдн шүүврән өгхәр белдҗәнә. Цуг таанриг әрүн седкләсн йөрәҗ, цаһан хаалһ дурдҗанавидн».
Дарунь таңһчин залврин Ахлач Босхмҗин Гиләнд үг өггдв. Энүнә келсәр, дунд сурһуль күн болһна төлә седклд өөрхн орм болна. Өдгә цагт көвүд-күүкд сән таалд сурна. Җил болһн мана таңһчд сурһульмуд ясгдад бәәнә, эннь йир сән йовдл мөн. Багшнрт болн эк-эцкнрт онц ханлтан күргәд, медрлин хаалһин йовудт эдн седклән болн килмҗән тусхаҗ, үрдән өскәд ик ач-тусан күргдгинь бас темдглв.
Байрин керг-үүлдврин йовудт эн сурһулиг төгсәсн, нег һазра мана дәәч Манҗин Эрнцнд цергә шишлң керг-үүлдврт орлцачин медаль бәрүлҗ өгснь бахмҗта йовдл болв. Өдгә цагт эн теңгсин 55-ч дивизин ханьд Барс-22 багин дәәч болна. Цергә шишлң керг-үүлдвр давҗадг һазрт ончрад, «Залу-зөргин» медаляр болн талдан ачлврмудар темдглгдсн билә. Эндр Манҗин Эрнцн олнд, нег үлү дорас өсч йовдг үйнрт үлгүр-үзмҗ болна.
Элст балһсна Хургин депутат, Хальмгин футболын федерацин һардач Хаска Аюка олна йөрәлин үгд багтҗ, «Футбол сурһульд» марһанд хойрдгч орм эзлсн гимназин сурһульчнриг йөрәһәд, һардач Саман Еленад шишлң диплом бәрүлҗ өгв.
Күндтә гиичнр сурһулин сарул-сәәхн хораст орад һарв, тер мет гимназин дәәнә туурмҗин музейд одв. Терүнд Төрскән харсгч Алдр дәәнә цагин болн цергә шишлң керг-үүлдврин ветеранмудын туск зургуд болн талдан тоот хадһлгдҗахинь үзв.
Әрәсән Баатр М-К.Гайирхановин нер зүүҗәдг «Дәәч» төвин взводын курсантнр музейин болн эврә үүлдврин тускар белдсн видеозурц гиичнриг икәр соньмсулв.
ОЛЬДАН Цаһан

Видео