Балһсна әмтнд сергмҗ үүдәв

Сегодня, 11:59 | Общество, Таңһчин зәңгс, Зіњг, Сойл

Намрин сард Элст балһсна Өдр темдглгднә. Эн байрта йовдлд нерәдҗ хотл балһсна микрорайодар байрин асхд бүрдәгднә. Сәәхн эн авъяс балһсна җирһлд кесгәс нааран батрсн бәәнә. Эн җил хойр сара хонгин туршарт олн элстихнд сергмҗ үүдәсн байрин асхд ноха сарин чилгчәр төгсв. Хотл балһсна Өдриг угтсн байрин нәр бүрдәмҗин сән таалд давҗ, олыг хамцулв.

Эн җилин «Элстин асхд» Әрәсән улсин ниицлтин җилин йовудт бүрдәгдҗәнә, сойлын көтлврт балһсна үүдәгч коллективс орлцв. Нәәрин йовудт элстихн урн һарин эрдмчнрин кичәлмүд орлцв. Үүрмүдтәһән амрхар ирсн улс лотерейд орлцад, кесг мөрә шүүҗ авв.
Җил болһн кегддг эн керг-үүлдврмүдиг ашлсн байр 10-ч микрорайонд ноха сарин нилчәр давв.
Иигәрән ирсн әмтн эрүл-мендин бәәдлән шинҗлв. «Сулда» төвин мергҗлтнр чаңһ-чиирг бәәхин туст сүв-селвгүд өгв.
Эн керг-үүлдврмүдин йовудт микрорайодар бәәдг олн келн- улсин ниитә өрк-бүлмүдт оньган тусхаҗ, ачлснь бахмҗта болв. Теднә тускар микрорайона әмтнд медүләд, балһсна һардврин нерн деерәс сертификатмуд бәрүлҗ өггдв.
Җилд нег балһсна нег районд бәәдг әмтн хоорндан харһад, хамцу байран кедгнь әмтнд таасгдна. Район болһна байрин көтлвр эврәһәрн соньн болв. Бәәрн коллективсин билг-эрдмнь җил ирвәс өсәд йовхиг үзҗ, әмтн байрлҗ, ханлтан өргҗәв. Сойлын көдләчнр болхла, эврә халхасн эн керг-үүлдврмүдт белдхләрн җилин туршарт Элстин микрорайодын җирһлд учрсн тоотыг әмтнд үзүләд, дууна, бииһин, шүлгин дөңгәр цугтад сергмҗ үүдәхәр шунна.

ҖИРҺЛИН Кермн

Видео