Лаганя багшт күцәмҗ дурдҗ

Вчера, 12:18 | Общество, Таңһчин зәңгс, Зіњг, Сурєуль-эрдм

Лагань балһсна 3-ч тойгта дунд сурһулин хальмг келнә багш Павла Елена (зургт зүн таласнь тавдгчнь) эн җилин мөрн сард таңһчин йилһән сән багшин өөдән нер зүүснь олнд бахмҗ үүдәв. Ода эн төрскн келнә багшнрин Цугәрәсән марһанд орлцхар белдҗәнә.
Павла Елена 2007 җилд түрүн болҗ таңһчин марһанд орлцла, тиигхд нүүрлгч багшнрла хамдан Италь орн-нутгт одад амрла. Хөрн шаху җил давсна хөөн дамшлтта багш дәкн марһлдхар седв. Дииләчнрин тоод орх санан билә, болв тиим өөдән күцәмҗ бәрхв гиҗ санҗасн угав, - гиҗ багш келнә.
Лаганя багшнр үүрән кесг халхар дөңнв. Марһана йовудт хойр девсңгин даалһвр күцәх кергтә билә. Негдвәр, ниигмин сүлҗәнә эв-арһар дамҗад бийиннь тускар келҗ өгх кергтә бәәсмн. Хойрдвар болхла, дамшлтан иткүлҗ белдврән үзүлх кергтә бәәсн мөн. Марһана ашт тавн күн дииләчин нер зүүхәр дөрлдв. Кичәлән давулад, сурһульчнрла күүндвр тогтаһад, ухан-тоолврарн хувалцх даалһвр өггдв. Тегәд дииләчин нер зүүсндән ик байрта бәәнәв гиҗ Елена Александровна марһана тускар келнә.
Цугәрәсән марһан Липецк балһснд болхмн. Түрүн девсңд кичәлән давулад, көдлмштән олзлдг эв-арһсин тускар медүлх кергтә. Орн-нутгин 85 багш терүнд дөрлдх, теднәс зуг 15 күн ашлгч девсңд һарх зөв авхмн. Таңһчин сурһуль-эрдмин болн номин министерствин болн КРИПКРО-н мергҗлтнр, хамдан көдлдҗәдг багшнр эн марһанд Павла Еленаг белдҗәнә.
Павла Елена Хальмг ик сурһуль төгсәһәд 1994 җилд Лаганя 3-ч тойгта сурһульд күч-көлснә хаалһан эклсмн. Сурһулин һардач Роза Мамаева баһ наста багшиг бүләнәр тосад, сүв-селвгән өгәд, нөкд болсмн. Ода Елена Александровна чадмг, седвәртә багш болҗ сурһульчнртан төрскн келнә туст бат медрл өгнә. Тиигәд 10-ч классин энүнә сурһульч Сюндюпа Клим төрскн келнә Цугәрәсән олимпиадт йилһрв. Тер марһан Хальмг ик сурһулин улд бүрдәгднә. Утх-зокъялын болн төрскн келнә марһанд орлцад, 300 сурһульч дундас Клим нүүрләчнрин тоод орв.
- Павла Елена Әрәсән сурһуль-эрдмин күндтә көдләч, Хальмг Таңһчин ачта багш болна. 2026 җилд таңһчин сән гисн багшин нер зүүснь хамдан көдлҗәдг үүрмүдтнь болн сурһульчнрт бахмҗта болв. Әтмнлә ээлтә, шунлтта, седвәртә багш күүкдтән төрскнч сурһмҗ өгнә, өвкнрин сойлын болн тууҗин тускар бат медрл заана. Маднла хамдан көдлҗәдг дамшлтта багш олнд үлгүр-үзмҗ болна. Елена Александровна Липецкд болх марһанд ик күцәмҗ бәртхә, - гиҗ сурһулин һардач Арнюдан Лидия дурдв.
Тиим дамшлтта, уралһ авг-бәрцтә багш мана таңһчиг Цугәрәсән төрскн келнә мергҗлтнрин марһанд элчлҗәхнь ик байрта-бахта йовдл болҗана. Мана таңһчин элчнр орн-нутгин эн дөрлдәнд урднь орлцад, сән гисн 15 багшин болн дииләчин тоод чигн орҗала. Ода Павла Еленад бидн бас ик күцәмҗ дурдҗанавидн, санснь санань күцтхә гиҗ йөрәҗәнәвидн.
ТҮРВӘН Һуна

Видео