Эдн таңһчин эмнлһст көдлхмн

Сегодня, 14:07 | Общество, Таңһчин зәңгс, Зіњг, Сурєуль-эрдм

Хальмг Таңһчин залврин Ахлачин дарук Өлзәтин Марина болн таңһчин эрүл-менд харлһна министрин үүл дааҗадг Мушаран Арслң Б.Б.Городовиковин нертә Хальмг ик сурһульд одад, эмнлһнә дацңгин үүлдврлә таньлдв. Ик сурһулин һардач Салан Бадм, дацңгин багшнр болн оютнр харһлтд орлцад, сурһулин хорас, эмчин эрдм дасхд олзлгддг кергсл үзүлв. Таңһчин эмнлһнә бүрдәцсин ах эмчнр бас эн харһлтд орлцснь темдгтә болв.
Эмнлһнә дацңгин медлд бәәдг шишлң төвд олн зүсн гем шинҗллһнә, түрүн дөң күрглһнә, эмнлһ болн тәрлһ келһнә төлә өдгә цага кергсл олзлгдна. Салан Бадмин келсәр, Росздравнадзорин бүртклһнә керг-үүлдврин йовудт эн төв бүрдәгдсн болв. Келхд, орн-нутгин зәрм ик сурһульмудт иим төв уга болад, эмнлһнә дацңгудын үүлдвр зогсагдв.
2023 җилд мана таңһчд Әрәсән залврин Ахлачин дарук Дмитрий Чернышенко керг-төрин халхар ирсн кемд Хальмг Таңһчин Толһач Хаска Бату Хальмг ик сурһулин көрң батруллһнд шаңһа дөң икдүлхин тускар сурсн билә. Терүнә ашт ик сурһульд бат ясвр келһнә болн өдгә цага кергсл хулдҗ авлһна төлә орн-нутгин хазнас 75 сай арслң һарһдгсмн. Хальмг ик сурһулин һардач Салан Бадм таңһчин һардвр цуг халхин дөң-нөкд болҗ, оютнрин болн багшнрин төлә сән таал тогталһнд нилчән күргҗәдг төләднь ханлтан өргв.
Хальмг Таңһчин залврин Ахлачин дарук Өлзәтин Марина ик сурһулин эмнлһнә дацңд цуг некврлә ирлцдг сурһулин кергсл бәәхиг өөдәнәр үнлв. «Таңһчин эмнлһсин ах эмчнрин келсәр, иим кергсл олзлад, оютнр гүн медрл болн сән дамшлт хоршаҗ авчахнь йир сән болна. Иим шишлң төв секәд, эмчин эрдм дасчадг оютнрин белдврт ик оньг тусхаҗахнь темдгтә. Энд сурчадг оютнр өөрхн иргчдән таңһчин эмнлһст ирҗ көдлхмн», - гиҗ Марина Петровна келв.
Эмнлһнә дацң Хальмг Таңһчин Толһач Хаска Батун болн таңһчин залврин дөңгәр 2022 җилд секгдсмн. Энд эмнлһнә кергин, бичкдүдин эмчин болн эмин халхин мергҗлтнриг белднә. Ода деерән энд 520 оютн сурчана. Темдглхәс, таңһчин эмнлһсин даалһврар 145 оютн сурчана, хөөннь эдн бооца батлсн бүрдәцст эрк биш көдлх зөвтә. Эмнлһнә дацңд сурчадг оютнр таңһчин эрүл-менд харлһна бүрдәцст медрлән гүүдүлҗ дамшлт хоршана. Н.Пироговин нертә, Сарпулин, Кубанск болн орн-нутгин эмнлһнә талдан ик сурһульмудын номтнр оютнрт лекцс умшна. 2028 җилд эмнлһнә дацң төгсәх түрүн мергҗлтнр таңһчин эмнлһсин бүрдәцст күч-көлснә хаалһан эклхмн гиҗ күләгдҗәнә.

ДООҖАН Наталья

Видео