Удмуртин хәләһәчнрин седкл авлв

Сегодня, 12:16 | Общество, Таңһчин зәңгс, Зіњг, Сойл

Басңга Баатрин нертә Келн-улсин театр Удмуртьд гастрольд йовад ирв. Эн гастрольмуд һаха сарин 25–ас авн 27 күртл болв. Хальмг театрин артистнриг Удмуртин Келн-улсин театр бүләнәр тосч авв.
Басңга Баатрин нертә театр энд һурвн наад үзүлв. Удмуртин Келн-улсин театрин тәәз деер һурвн хонгт хальмг улсин бәәдл-җирһл болн тууҗ үзүлгдснь бәәрн хәләһәчнрт таасгдв. Тиигәд театрмудын үүлдврин дөңгәр әмтн нег-негнәннь билг-эрдмлә таньлдҗана. Хальмг театр «Араш» болн «Экин туск частр» гидг наадд, тер мет «Күүнә үрн» гидг шог наад үзүлв.
Хальмг театрин гастролин түрүн өдр залд театрин художественн һардач Манҗин Борис тәәз деер һарч ирәд, нааднд юуна тускар келгдҗәхинь ахрар цәәлһв. Хальмгин режиссер төрскн һазриннь тускар келҗ өгв. Эврә һазрин тууҗин болн әмтнә авъясмудын тускар Манҗин Борис олн наад белдҗ тәвсмн.
Наадна өмн Удмурть Республикин Хүүвин Ахлач Владимир Невоструев Манҗин Борист Ханлтын бичг бәрүлҗ өгв. Келн-улсин хоорндк сойлын залһлда батллһнд хальмг режиссерин ач-тусинь тиигҗ үнлв. Гастрольд ирсн Хальмг театрин нерн деерәс Манҗин Борис бәәрн театрт белгән нерәдв.
«Араш» нааднд үзүлгдсн хальмгудын зовлңта цагин - тууврин һашута йовдлмуд хәләһәчнрт өөрхн болв. Үнн юмн үнндән һардгинь кен-чигн меднә. Иигәд театрин үүлдврин дөңгәр Удмуртин хәләһәчнр хальмг улсин бәәдл-җирһллә таньлдв. Хальмгудын үзсн зовлң эдниг үүмүлв. Наадна хөөн кесгнь нульмсан бәрҗ чадлго бәәсинь артистнр тодлна.
Эн нааднд артистк Һәрән Делгр түрүн болҗ орлцад, Арашин дүриг лавтаһар наадсинь хәләһәчнр өөдәнәр үнлв.
«Ик гастрольмуд» гидг орн-нутгин төсвин дөңгәр Хальмг театр Удмуртьд одсмн. Басңга Баатрин нертә театрин наадн болһн бәәрн улст икәр таасгдв. Удмуртин сойлла таньлдад, Ижевск балһсна ке-сәәхн тоотыг эргҗ хәләв,- гиҗ Удмуртин Келн-улсин театрин художественн һардач Н.Ложкин ухан-тоолврарн хувалцна.
Терүнә өмн хойр долан хонг урд Удмуртин театр Хальмгт гастрольд ирсмн. Басңга Баатрин нертә Келн-улсин театрин тәәз деер эдн нааддан үзүллә. Хальмгин хәләһәчнр эднә нааддыг оньган өгч хәләсиг Удмуртск театрин артистнр тодлна. Хальмгт үзсн тоот, үүрмүд-артистнрлә үүдәгч соньн харһлт болсиг эдн мартҗахш. Хамцу төсвс күцәх цаг ирх гиҗ эдн нәәлҗәнә.
Хойр театрин артистнр хоорндан өөрхн таньлдҗ, үүдәгч үүлдвриннь тускар күүндх, дамшлтарн хувалцх таал учрв», - гиҗ Удмуртин сойлын министрин үүл дааҗадг Владимир Соловьев хойр театрин гастрольмудын тускар ухан-тоолвран медүлв.
Наадн болһн эврә тууҗта болдгиг хәләһәчнр медҗ авв. «Араш» гидг наадн хальмг улсин җирһлд учрсн зовлңта цагиг үзүлҗәнә.
«Экин туск частр» күн болһна җирһлд экин дурна күчн ямаран болдгинь медүлҗәнә. Экин дурна евәлтә күчинь кен эс меднә. Экин дурна тускар, эк күүнә өөдән дааврин тускар эн наадн медүлнә.
«Күүнә үрн» гидг шог наадн күүнә җирһлд учрдг җаңһрта зәрм йовдлмудыг наадн-инәдн хоорнд талдан хәләц һарһҗ медҗ авхд туслҗана. Яһдг болв чигн цааранднь бәәх, көдлмшән кех, үрдән өскх кергтәлм. Әрәсән Президентин седвәрәр кегдҗәдг «Өрк-бүл» гидг келн-улсин төсвин йовудт босхгдҗадг төрмүдт оньг тусхагдҗана.
Басңга Баатрин нертә Келн-улсин театр Удмуртьд үзүлсн наадд олн-зүсн төрмүдт нерәдгдҗ, әмтнә оньг авлснь байрта йовдл болв.
Иигәд Удмуртин хәләһәчнр һурвн хонгин туршарт хальмг сойлын дүүрәнд бәәв. Хойр театрин артистнр хоорндан өөрхн таньлдад, дамшлтарн хувалцв. Тиигәд хойр республик хоорнд сойлын залһлдан батрҗахиг театрмудын гастрольмуд иткүлв.
ҖИРҺЛИН Кермн

Видео