Элстәс авн Херсон күртл...

Сегодня, 12:52 | Общество

Әрәсән Социальн саң эндр социальн дөң күрглһнә халхар хамгин һоллгч бүрдәц болна. Урднь үүлдҗәсн Пенсионн болн Социальн даатхлһна саңгуд нииләд, эднә улд 2023 җилд ирлцңгү шин саң бүрдсн болдг. Пенсь, социальн дем, нег дәкҗ һарһҗ өгдг мөңг, экнрин мөңг йилһлһнә, бичкдүдтә өрк- бүлмүдиг, инвалидмүдиг, цергә шишлң керг- үүлдврт орлцачнриг болн эднә өөрхн улсиг дөңнлһнә төрмүдиг минь эн Социальн саң хаһлҗахинь темдглхмн. Энүнә көдлмшт шин эв- арһс өргнәр олзлсна ашт ода әмтн ямр чигн дашкан угаһар гертәсн эдниг соньмсулҗадг төрмүдәр цәәлһвр-туслмҗ авч чадҗахинь басл үнлх кергтә.
Хая нег эврә кергәрн Хальмг Таңһчар үүлдҗәдг Әрәсән Социальн саңгин әңгд ирхләрн ик зуудан энд баһчуд көдлҗәхинь үзнәч. Тиигчкәд нурһлҗдан медәтә улсиг теткҗәдг баһ наста мергҗлтнр дааврта, өр- өвч, цаһан седклтә улс болҗахинь медәд чигн йосндан байрлнач. Эдн дунд пенсь болн нань чигн социальн дем йилһҗ өгдг әңгд көдлҗәдг Дурдуса Эңкриг (зургт) онц темдглх кергтә гиҗ сангдна. Эңкриг бичкнәснь ээҗнь асрсн мөн, тегәд эн кен- негнднь килмҗән тусхаҗ, төрскнч седклтә күн болҗ өсснь тер. Целинн района Троицкое селәнә Б. Б. Городовиковин нертә гимназьд сурчасн цагтан чигн күүкн иргч үүлдврән әмтнд дөң- нөкд болх керглә залһхар шиидсн болдг. Сурн бәәҗ билгтә күүкн «Веселая карусель»ансамбльд зурһан җилдән биилв, «Нарн» гидг бичкдүдин бүрдәцин керг- үүлдврмүдт шунмһаһар орлцснь чигн сән ашта болв. Нег- негән дөңнҗ, даавртаһар хамдан көдлдгиг чигн эн дасв. Даруһас Эңкр Б. Б. Городовиковин нертә Хальмгин ик сурһульд күцәмҗтәһәр сурсмн. 2024 җиләс авн болхла Дурдуса Эңкр Хальмг Таңһчар үүлдҗәдг Социальн саңгин әңгд көдлҗәдг болна. Ахр цагин кемд эн эврә кергән сәәнәр меддг, тоолврта, дааврта мергҗлт болҗахан иткүлв, гиҗ хамдан көдлҗәдг ах үүрмүднь энүг буульна. -Кен- негнднь пенсь йилһҗ өгхәс урд цугинь чикәр тоолад, кесг бәрмт цаас гүүнәр шинҗлх кергтә болна. Зәрмдән нам нег күүнә йоста җирһлин тууҗла таньлдҗ, олн җилин күч- көлсч хаалһинь тоод авч, нег үлү нан тал ирсн медәтнрт оньган тусхаҗ, дөңгән күргснь урмдта болна, -гиҗ Эңкр келнә. Энүнә бәәдл-җирһлд учрҗадг йовдлмудын тускар келхләрн, баһ наста күүкн одахн гилтә керг- төрин халхар Крым Республикд одад ирсән бүләнәр тодлҗ бахтна. Тенд Эңкр Запорожск болн Херсонск мүҗсин бәәрн улст пенсин болн социальн талдан демин халхар туслмҗан күргв. Энд көдлхд амр болсн уга, кен- негнднь нөкд болхин төлә эндр үүлдҗәдг закадыг сәәнәр медсн деерән зүткәтә, сөрлцәтә йовдлмуд учрсн саамд тер дарунь гилтә ирлцңгү чик шиидвр батлх кергтә болв. Тиигчкәд тер һазрт тогтсн үүмәтә бәәдлиг оньгтан авч, күн болһна туст өр-җөөлн седклән медүлх кергтә бәәсмн. Ахр цагин болзгт көдлсн бийнь бәәрн улсин зөв харслһна халхар социальн дем йилһҗ, шаңһа мөңг авхднь туслснь Эңкрин төлә ик байр- бахмҗ болв. Нидн болхла Дурдуса Эңкр Элстин клиентск цергллтд ирҗ көдлв. Энд бас баһ наста мергҗлт пенсь йилһҗ өглһнә туст мана иргнмүдт дөң- тусан күргв. Зәрмдән үүмҗ ирсн кен- негнднь бүлән үгән келәд төвкнүләд, төртнь орлцх седклән медүлснь басл ик юмн болна, - гиҗ эн келнә. - Нег дәкҗ нан тал ухан - седклән гееһәд, ю кехән эс медсн медәтә күүкд күн ирв. Энүнә келсиг оньган өгч соңсад, эн саамд ямр шиидвр авснь чик болхинь тодрхаһар цәәлһснә хөөн медәтин седкл санамрдв. Күн болһна җирһл әдлхн болхш, кенднь чигн байрлх, зовад- түрх чигн саам учрдг биший. Тегәд кен медхв, кергтә цагт келсн бүлән үг иргчдән җирһлин төринь хаһлхд чигн туслх биз… Өврмҗтә, бахмҗта болҗ дәкәд нег йовдл тодлгдсна тускар Эңкр бас хувалцв. Тиигәд эн нег һазра Әрәсән Баатрин төр хаһлҗ, сар болһн авдг мөңг йилһҗ өгснь күүкнә төлә цергә даалһвр бәәтхә ик чинртә керг болҗ тоолгдв. -Энүнә бәрмт цаасиг белдсн саамд ямр чигн тоотыг оньгасн алдҗ болшго билә, тегәд зөвәр үүмсн деерән йосндан бахтлав, -гиҗ баһ наста мергҗлт келнә. -Өөдән нер зүүсн нег һазра мана дәәчин төрт орлцснь чинртә болн күндтә керг мөн. Тегәд цугинь тоод авад диглҗ, мана Баатр шаңһа демиг цаг- болзгтан авхин төлә шунсн биләв. Үр- иньглгч таалд ниитә коллективд көдлснь ямр болв чигн амр биш төриг арднь орҗ хаһлхд туслдг болна. Пенсь болн социальн талдан дем йилһҗ өглһнә Заллтд минь иим күч-көлсч коллективд цугтан нег- негән дөңнҗ, кен-негән тевчҗ хамцу көдлдгиг Эңкр онц темдглнә. Күнд- күчр йовдл учрсн кемд цугтан эн төр хаһллһнд орлцад, дамшлтарн хувалцҗ, арһ-чадсарн дөңндг мөн. Социальн саңгин көдләчнр тал өдр болһн әмтн олар ирдгнь лавта юмн, эдн дунд седклднь икәр ханснь чигн, эврә үүмәтә төрән медүлҗ хаһлхар седдгнь чигн харһна. Тегәд минь иим баһчудын нилчәр Социальн саңд иткҗәдг улсин то өдр ирвәс өсәд йовна гиҗ келҗ болхмн. Нааран ирсн күн болһниг килмҗтәһәр теткҗ, цәәлһвр өгч, нөкд болҗахиг мана иргнмүд лавтаһар үнлҗәхиг эннь герчлҗәнә. -Эврә кергән даавртаһар күцәсн деерән күн болһна төртнь орлцҗ, өр- өвч, сана зовгч седклән медүлҗ хәәрлх кергтә. Нег күүнд чигн дөңгән күргҗ, чееҗинь девтәсн болхла, йосндан байрлҗ- бахтнач. Тегәд бүлән үгәрн седклинь халулҗ эврә улстан нөкд болҗахнь мини төлә хөв- кишг болҗ үнлгднә, -гиҗ Эңкр келснд чигн йосндан иткнәч. Эннь ямр чигн өгҗәллһн уга үгмүд мөн, минь иим җөөлн заңта, гүн медрлтә мергҗлтнрин нилчәр Хальмгин миңһәд иргнмүдин төлә Социальн саң өдгә цагин итклтә ул-сүүр болҗахнь маһд уга, гиҗ энд көдлҗәдг ах үйин улс чигн бат итклтә бәәнә. Шагҗин Любовь Өрк-бүлин архивәс авсн зург

Видео