Хальмг зег Нью-Йоркд үзүлгдв

Сегодня, 12:19 | Общество, Таңһчин зәңгс, Зіњг, Сойл

Нью-Йоркд болсн өдгә цага хувцна долан хонгт хальмг улсин зег хатхмр, бамб болн бадм цецгүд иргч цагин хувц үүдәдг улсин оньг авлв.
«Давсн, өдгә, иргч цаг» гидг нертәһәр үзүлгдсн хувцна хураңһу Нью-Йоркин ик һәәхүлд йоста өврмҗ үүдәв. Модельер Ульяна Урюсова үзүлсн эн хувцн тиигҗ шууга татв. 2012 җилд хувц үүдәлһнә халхар үүлдҗәдг эн эрдмч Флоридад дизайна болн өдгә цагин эв-арһин Академь төгсәв. Дарунь Парижд үүлддг Лесаж сурһулин хатхмрин халхар бәрмт цаас авсн болдг.
Бруклинд болсн хувцна һәәхүлд хальмг дизайнер күүкд улсин олн-зүсн хувц үзүлв. Асхни нәәрт өмсдг бүшмүд, киилгүд, шалврта зергднь майгиг дахулҗ өмсдг деерк хувцн әмтиг икәр соньмсулв. Олн зүсн эдәр уйгдсн хувцн өдгә цага бәәдллә ирлцҗәхинь әмтн тер дарунь темдглв. Тиигәд хальмг дизайнер өдгә цага хувц уйҗ болхинь үзүлв.
Тиигчкәд бамб эс гиҗ бадм цецгүдәр кеерүлгдсн хувцн кесг әмтнд таасгдҗана. Хатхмриг дахулад, өңгтә чолу орулҗ кеерүлснь хувциг йосндан сәәхрүлнә. Мончгар кеерүлсн хувцн нег үлү әмтнә нүднд тусад бәәв. Билгтә хальмг модельерин белдсн хувцн тиигәд уйгдсн эдәрн, шаглҗ кеерүлсн хувцна өңг-зүсәрн болн эвинь олҗ олзлсн өңгтә чолуһар һәәхүлд ирсн әмтнә оньг авлв.
Ульяна Урюсова белдсн олн-зүсн сәәхн хувциг хальмг күүкд чигн дигтә кевәр үзүлҗ чадв.
Келхәс, Ульяна Урюсова Элст балһснд һарсмн, энд өсәд-боссмн. Сүл 15 җилд Ульяна хувц үүдәҗ, шин кеерүл ухалҗ һарһдг эрдмәр үүлдҗәнә. Эрдмнь батрад, Ульяна хувц уйҗ, олнд үзүлдг эврә Гер Нью-Йоркд секәд, ээҗиннь нер өгсмн. Ээҗнь Түмн нойна тохмин күүкд күн бәәҗ.
Хальмг хувцна Гер секх, хальмг хувц олнд үзүлх седкл Дала Ламин Гегәнлә харһсна хөөн үүдсн билә. Тегәд күүкн сансан күцәв. Энүнә хальмг хувцн делкән хамгин чинртә һәәхүлмүдт үзүлгдҗәнә.
Өдгә цага эв-арһсиг олзлдгарн чигн Ульяна Урюсова темдгтә. Америкд болсн то-дигин янзар үүдәгдсн хувцна долан хонгт хальмг модельер орлцад, хальмг күүкд күүнә терлг олнд үзүлснь өврмҗтә болв.

УШКАНА Сувсн

Видео