Элстин лицейд болсн нәр

Сегодня, 12:54 | Общество, Таңһчин зәңгс, Зіњг, Сурєуль-эрдм

Алдр орс шүлгч Александр Пушкин эврә үүдәврмүдтән хальмг улсиг тодлҗ, теегин кеермҗ болсн хальмг күүкд күүнд нерәдсн шүлгиг ода кен эс меднә. Тер мет Элстин лицейин сурһульчнр алдр орс шүлгчин үүдәврмүдин тускар лицейин Өдрлә эврә кичәлмүдтән бас нег тодлснь темдгтә болв.

«Ах классмудын сурһульчнр эврә багшнрла хамдан лицейин Өдрт эртәс белднә. Эндр Пушкинә бәәдл-җирһлд болн терүнә үүдәлтд нерәдсн кичәлмүд болв, лицейин цуг сурһульчнр терүнд орлцҗ илдклән кев, ахр наадан чигн үзүлв. Эн керг-үүлдвр бүрдәлһнд мана күүкдин эк-эцкнр бас ик дөңгән күргв, теднд багшнр ик ханлтан өргҗәнә»,- гиҗ 10-ч «Б» болн 11-ч «Б» классмудын һардач Армана Наталья келв.
Хулһн сарин 17-ла үдин хөөн цуг лицеистнр Элстин бичкдүдин үүдәлтин бәәшңд цуглрв. Энд эдн Пушкинә цагин Энск балһснд ирҗ кезәңк банкд, зургудын галерейд, поштд одад, кергән күцәһәд, нуувч бичгән илгәһәд тер цага бәәдл-җирһл ямаран бәәсинь лавтаһар медв.
Кезәңк лавкин делгүрт олн зүсн эд-тавр хулдгдҗана, терүнд лицейин хойр күүкн ирсн әмтнд эд-таврин үнинь, альк балһснас терүг авч ирсинь болн нань чигн кесг тоотынь цәәлһв. «Маднд хулдачнрин көдлмш икәр таасгдҗана, бидн кезәңк цагин тускар соньн тоот медҗ аввидн. Мана эд-тавриг үнтәһәр хулдхла, лавкин олз-ору өсхинь медвидн», - гиҗ күүкд хувалцв.
Сурһульчнр Пушкинә цагин ке-сәәхн хувц-хунр өмсәд кеерәд, йостаһар тер хуучна цагин бәәдлиг үзүлв, эн наадн эднд таасгдв. Тер цага би биилдг Пушкинә нәәрт орлцсндан чигн эдн байрлв.
- Элстин лицейин нәр сәәхн, ончта керг-үүлдвр болна. Мана көвүн лицейд сурна, лицеистнр хоорндан ах-дүүһинәр бәәнә, тер иньгллтиг мана күүкд бәәдл-җирһлин туршарт мартшго гиҗ сангдна. Даруһас ик сурһульд орсн бийнь эдн нег-негнләрн урдк кевәрн үүрләд бәәхнь лавта. Мана көвүн нидн Андрей Болконскийиг, Петр хаана дүриг Элстин лицейин театрин нааднд үзүллә, эндр болхла эдн Пушкинә нәәрт кезәңк би биилх. Лицейд чик сурһмҗ өгнә, тегәд күүкдән нааран орултн гиҗ эк-эцкнрт селвгән өгчәнәв. Эн нәр Пушкинә цагиг сәәнәр үзүлҗәнә, тернь ик белдврин көдлмшин күцәмҗтә ашнь мөн, - гиҗ лицеистин эцк Сергей Коробейников келв.
Нәр эклсн кемд эк-эцкнр болн багшнр, сурһульчнр XIX зун җилин би биилҗ тер цага авъясинь медүлв, эврә билг-эрдмән үзүлв.
- Эн сәәхн нәәрт орлцхин төлә күүкд урдаснь белдв. Багш-хореограф күсдундур сардан кезәңк би биилдгиг эднд дасхв. 8-ч классмудын сурһульчнр хуучн би сәәнәр дасв, яһад гихлә эдн түрүн болҗ лицейин Өдрт нерәдсн керг-үүлдврт болн Пушкинә нәәрт орлцв. Тер мет мана лицейин театрт орлцачнр Пушкинә үүдәвр олзлҗ наад тәвнә. Эн җил лицеистнрин зергләнд шунлтта, седвәртә, билгтә сурһульчнр орв, тегәд эдн театрт наадад билг-эрдмән үзүлҗәнә, - гиҗ лицейин һардачин дарук Һәрән Наталья келв.
Лицейин театрин нааддт орлцдг күүкд драмин болн комедин Орс театрин артистнрлә хамдан бичәч Борис Васильевин түүкәр тәвсн «Маңһдур дән болла» гидг нааднд билг-эрдмән үзүлв. Лицейиг төгсәсн улс мадниг мартхш, мана керг-үүлдврт ирнә, кергтә болхла дөңгән күргнә, гиҗ Наталья Николаевна темдглв.
Пушкинә нәәрин хөөн 8-ч классмудын сурһульчнриг лицеистнрин зергләнд орулҗ авлһна керг-үүлдвр болв. Арвтнр андһаран өгснә дару эднд өрчднь шишлң темдгүд зүүв. Хальмг Таңһчин сурһуль-эрдмин болн номин министр Александр Ким, эврә цагтан эн лицей төгсәсн таңһчин экономикин болн хулд-гүүлгәнә министр Чиҗин Андрей, лицейин һардач Анжира Софья арвтнриг ончта йовдлла йөрәҗ, сурһулян сәәнәр сурч, олна үүлдврт шунмһаһар орлцхиг дурдв.

ТҮРВӘН Һуна

Видео