Әрәсән марһанд ончрв

Сегодня, 11:52 | Общество, Таңһчин зәңгс, Зіњг, Сойл

Баһ Дөрвдә бичкдүдин билг-эрдмин сурһулин «Теегин торһас» ансамбль Москва балһснд болсн «Аврора» гидг нарт-делкән мөрән дииләчнр болв. И.Тургеневин саң бүрдәдг марһанд цуг орн-нутгас миңһн һар уйн наста билгт орлцв. Тедн дунд мана бичкн домбрчнр диилвр бәрәд, хальмг улсин сойл - билг-эрдмиг олнд медүлснь бахмҗта йовдл болв.
Бичкдүдин билг-эрдмин сурһулин багшнр Мукан Санлын болн Атинә Иринан һардврт «Теегин торһас» ансамблин күүкд домбр цокад, жюрин гешүдин седкл авлв. Марһана ашар домбрчнрин ансамбль «Зевсгүдин үүдәлт» гидг әңгд һол мөрә шүүв, тер мет дииләчнрин I девсңгин Дипломар ачлгдв.
Баһ-Дөрвдә района толһач Баатр Джекиев домбрчнриг болн эднә багшнриг нарт-делкән мөрән дииләчнр болснлань йөрәһәд, эдн төрскн һазриннь нер дуудулв гиҗ темдглв. «Мана һазра алдр җаңһрч Ээлән Овлан нерн нарт-делкәд темдгтә болна. Дорас өсч йовдг баһ наста билгтнрин үйнрин хоорндк залһлда батрулҗ, билг-эрдмәрн бас нер һарч йовхиг өөдәнәр үнлхмн. Уйн наста домбрчнрин үүдәлтин хаалһнь цаһан болтха, цааранднь чигн улм ик күцәмҗ бәрҗ йовтха», - гиҗ района толһач йөрәв.
БАТАН Сәәхлә
ЗУРГТ: «Теегин торһас» ансамбль
марһанд орлцсн кем

Видео