Олн келн-улсин көгҗм күңкнв

Элстд болсн келн-улсин оркестрмүдин наадм олн келн-улсиг негдүлсн болҗ медгдв. Үкр сарин 3-д Башкирин келн- улсин зевсгүдин оркестр эн наадмиг товчлв.
Әрәсән келн- улсин ниицлтин җилд мана таңһчд олн керг-үүлдврмүдәр темдгтә болҗана. Хальмгин келн-улсин оркестр Әрәсәд түрүн болҗ оркестрмүдин наадм бүрдәснь нег үлү ончта болв. Һурвн долан хонгин туршарт Элстд Әрәсән келн-улсин көгҗмин зевсгүдин оркестрмүдин концертс болҗав.
Хальмгин олн хәләһәчнрт талдан келн-улсин көгҗмлә таньлдх арһ учрсмн. Эн наадм Хальмгин келн-улсин оркестрин седвәрәр бүрдәгдәд, Әрәсән сойлын Министерствин, «Росконцертин» болн Хальмг Таңһчин сойлын болн зуульчллһна министерствин дөңгәр сән йовудтаһар давулгдв. Көгҗмин байр ямр кевәр бүрдәгдснә, эн байрин көтлврт ямр концертс болн харһлтс болсна тускар Келн-улсин оркестрин һардач Нимгрә Оксана келҗ өгв. Тиигәд, эн байрин йовудт һурвн ик концерт болв. Концерт болһна түрүн әңгд талдан һазрас ирсн гиичнр билг-эрдмән үзүлв. Хулһн сарин 23-д Санкт-Петербургас ирсн «Метелица» гидг орс зевсгүдин оркестрин, эднә дару Ар Үзгин Осетин - Аланя көгҗмин оркестрин концертс әмтнд таасгдв. Башкирин келн-улсин зевсгүдин оркестр бас билг-эрдмәрн таңһчин әмтиг байрлулв.
- Эн коллектив Хальмгт түрүн болҗ ирҗәнә. Болв эднә көгҗмиг болн үүдәгч үүлдвриг бидн сәәнәр меднәвидн. В. Карпенко коллективиг һардҗасн цагт Хальмг оркестр Уфад одад, билг-эрдмән үзүлсн билә.Тегәд мана хойр келн-әмтнә хоорндк сойлын залһлдан олн җилин тууҗта. Ода мана хәләһәчнр башкирск көгҗмлә таньлдв, - гиҗ Келн-улсин оркестрин художественн һардач, Хальмг Таңһчин билг-эрдмин ачта үүлдәч Катан Савр келнә. .
Башкирин коллективиг толһалҗ ирсн ах дирижер Ринат Мухаметзяновин келсәр, башкирск көгҗмчнр хальмг хәләһәчнриг олн үүдәврмүдәр байрлулв. Хальмг Келн-улсин оркестрин дууч Брюгидикә Айса Башкирин оркестриг дахч башкирск ду дуулв. Концертин хойрдгч әңгднь Хальмг болн Башкирск оркестр хамдан башкирск болн хальмг көгҗм татад, әмтнд сергмҗ үүдәв. Чонкуша Петрин, Манҗин Аркадин көгҗм эн өдр күңкнв. Моңһл көгҗм чигн эн өдр соңсгдв. Хальмгин нертә дуучнр Шалхана Данара, Мергн Ким, Каҗин Елена эн асхн дуулсн дуд цугтад байр үүдәв. Нертә дуучнр Дагестанас, Кабардино-Балкаряс, нань чигн һазрас ирҗ, көгҗмин эн байрт орлцҗ хальмг болн башкирск дуучнрла, көгҗмчнрлә хамдан билг-эрдмән үзүлв.
Келн-улсин көгҗмин нәәрин дәкн нег ончнь Хальмгт ирсн коллектив болһна көгҗмчнр Элстд билг-эрдмин болн көгҗмин колледжин, сурһулин оютнрла харһҗ, келн-улсин көгҗмин зевсгин тускар келҗ өгснь баһчудт соньн болв. Нимгрә Оксанан тоолврар, көгҗмин иим харһлтс ик чинртә. Көгҗмчнрин нөкцлт батрсн деерән бичкдүд болн баһчуд көгҗмчнрлә болн дуучнрла харһад, талдан келн-улсин үүдәврмүдлә таньлддг болна.
- Көгҗмин оркестрмүдин харһлт бүрдәһәд, мана хәләһәчнриг Әрәсән сән гисн коллективсин билг-эрдмлә таньлдулвидн, - гиҗ Катан Савр наадмин ашинь диглҗ келв. – Көгҗм олн келн-улсиг хамцулҗадг нег чинртә халхнь мөн. Тер учрар Хальмгин Келн-улсин оркестр Әрәсәд нертә коллективсиг эрк биш Элстүр авч ирхәр шунна. Иигәд, Тыван коллектив, Л. Зыкинан нертә «Душа России» ансамбль болн нань чигн нертә көгҗмчнр Элстд ирҗ, билг-эрдмән үзүлсинь әмтн тодлна.

УШКАНА Сувсн