Насан утдулх кем

Сегодня, 10:22 | Общество, Таңһчин зәңгс, Зіњг

Хальмг Таңһчд эн җил Зул бар сарин 3-д темдглгдхмн. Тогтсн авъясар Зулын өмн насан утдулдг мөргүлмүд болна. Хальмгудын хамгин һол байр ирдг цагиг цугтан ик байртаһар тосна. Бурхн Багшин Алтн сүмдән әмтн ирәд мөргүлд орад, насан утдулсна хөөн цугтан Зулан тосна. Кезәңк цагас авн мана җирһлд батрсн байрин эн өдрмүд цугтад ик урмд өгнә. Җилин туршарт болсн тоотан тодлад, әмтн орҗах җилд кех-күцәх кергүдән темдглҗ авна.
Бурхн-шаҗндан шүтлһнә авъясла гүн кевәр залһлдата оюни эн байр йириндән хальмгудт иргчин иткмҗ өгнә. Сарин литәр Зулыг арвдгч сарин хөрн тавнд темдглнә. Тиигәд Зулын өдр эн җил бар сарин 3-д харһҗ ирҗәнә.
Цугтад хәәртә эн өдр зул өргдг учрар Зул гиҗ нерәдсмн гисн домг бәәнә. Эн өдр өргсн зулын герл шинрлтин темдг болҗ, әмтнд урмд өгнә.
Бурхн Багшин Алтн сүмд нас утдуллһна мөргүлмүд үкр сарин 14-әс авн эклҗәнә.
Ут тоодан зурһан мөргүлиг хурлын гелңгүд күцәхмн. Әмтн амрлһна өдрмүдлә хурлд ирҗ өрүн 9 часас авн эклдг мөргүлд орлцҗ, насан утдулҗ чадҗана. Эн мөргүлмүдт орлцхларн әмтн хурлын гелңгүдлә хамдан Амитаюс бурхнд, Ушнишавиджая бурхнд, Цаһан Дәркд зальврхмн.
Зулын байрин өмн Бурхн Багшин Алтн Сүм урһҗадг шин җилин сарин лит барлсна тускар зәңглҗәнә. 2027 җилин сарин литд бурхн-шаҗна халхар хамгин чинртә йовдлмуд орулгдсмн. Мөргүлмүд келһнә, мацг бәрлһнә, шаҗна йосрхл күцәхд тааста терүнд заагдсн бәәнә. Өдр болһна үүлдврт туслх нань чигн тоотыг эн литд олҗ болхмн.
Зул хальмг улсин сойлын болн оюни җирһлин ухани зөөрин салһгдшго нег әңгнь болҗана. Кезәнәс авн Зулын байр хальмг улсин үйнриг залһҗадг гүн учр-утхта авъяс болҗана. Эн сәәхн авъяс хальмгудын өрк-бүл болһнд хадһлгдҗ йовна.
Энкр манахс, насан утдулад, Зулын байран тосий!

УШКАНА Сувсн

Видео