Эдл-ахун нүүрләчнриг ачлв

Сегодня, 10:53 | Общество, Таңһчин зәңгс, Зіњг

Ик Буурла района Чолун Хамр селән 65 җилин өөнән темдгләд, байрин керг-үүлдврмүдән бүрдәв. Хальмг Таңһчин Толһачин һардврин ахлач Кирилл Попов, Хальмг Таңһчин Улсин Хуралын (Парламентин) Ахлачин дарук Бадмин Вячеслав, таңһчин сойлын болн зуульчллһна министр Бембин Евгений, таңһчин тосхлтын, көлгн-күчнә болн хаалһин эдл-ахун министрин үүл дааҗадг Шахана Андрей, Ик Буурла района толһач Көкән Арслң байрин хургт орлцад, селәнә әмтиг ончта өөнләнь йөрәв.
Хальмг улс Сиврин тууврас хәрҗ ирснә дару 1958 җилд Чолун Хамрт тосхлтын чолу олҗ авдг болв. Дарунь энд көдлҗәсн улсин гермүд тосхгдҗ, селән бүрдәгдсмн. Хальмг АССР-ин Деед Советин зәрлгәс иштә 1961 җилин мөрн сарин 8-әс авн Чолун Хамр селән гиҗ үүлдврән эклсн болдг.
Ончта өөнд нерәдәд селәнә бәәрн сурһульд цергә болн күч-көлснә туурмҗин музей секгдв. Дорас өсч йовдг баһ үйнр төрскн селәнә тууҗ, эврә һазрин делгрлтд ач-тусан күргсн нег һазра улсин тускар медтхә гиһәд, эн музейд зургуд, иткл цаасд болн ветеранмудын тодлврмуд цуглулгдв.
Төрскән харсгч Алдр дәәнд, цергә шишлң керг-үүлдврт орлцсн, Сиврин тууврин хөөн төрскн һазртан ирәд, эдл-ахуд олн җилдән үнн-чик седклтәһәр көдлсн улсин ач-тус темдглҗ, селәнд санлын болн туурмҗин парк секгдв. Урһа модна шишлң бәәрнд углҗ тәвгдсн һурвн бумб босхлһнд эн һазрин чолун олзлгдв.
Байрин хургин йовудт нүүрлгч күч-көлсчнрин, селәнә улсин ач-туснь өөдәнәр үнлгдв. Өөнин харһлтын чилгчәр концерт болв.

БАТАН Сәәхлә

Видео