Хальмг тохмта ямад асрхар

Үкр сарин 11-әс авн 13 күртл Москван мүҗин Пушкино балһснд тохма малын керг шинҗллһнә номин Цугәрәсән күрәлңгин улд «То-дигин делгрлтин цагт тохма мал өсклһн» нертә номин-дамшлтын нарт-делкән ик хург болв. Керг-үүлдвр күрәлңгин 50 җилин өөнлә ирлцүлҗ давулгдв. Терүнд Әрәсән йосна, номин академин, орн-нутгин регионмудын болн Беларусин, Казахстана, Таджикистана, Китдын элчнр орлцв.
Хургин көдлмшин йовудт бод мал, һаха, хө болн яма өсклһнә болн баахн номтнрин үүлдврин төрмүд хаһлгдв. Хургт орлцачнр селекцин, генетикин, биотехнологин, АПК-н халхд өдгә цагин некврлә ирлцдг эв-арһсиг олзллһна тускар өргн күүндвр тогтав.
«Хө болн яма өсклһн» әңгин көдлмшт селәнә эдл-ахун номин кандидат, мана таңһчин нүүрләчнрин тоод ордг «Кировский» эдл-ахун һардач Һәрән Бадм (зургт) орлцснь темдгтә болв. Бадм Есиновичин келсәр, эн хальмг тохма ямад өсклһнә төрәр илдкл белдҗ олнд соңсхв.
«Кировский» эдл-ахуд олн җилдән бод мал, хөд, ямад, темәд, мөрд асрҗана. Һәрән Бадм эврәннь эдл-ахун тускар тодрхаһар келҗ өгв. Эндр эдл-ахуд һурвн миңһн шаху яман асргдҗадг болна. Бурск болн оренбурск тохма ямадыг негдүләд тохм ясруллһна туст ирлцңгү көдлмш күцәгдҗәнә. Эн төсв күцәлһнд К.А.Тимирязевин нертә селәнә эдл-ахун академин, Поволжск номин шинҗллтин күрәлңгин болн Б.Б.Городовиковин нертә Хальмг ик сурһулин номтнр дөңгән күргҗәнә. Тер мет селәнә эдл-ахун халхар көдлдг РАН-а номтнр Х.А. Амерхановин, И.Ф. Горловин болн Б.А. Юлдашбаевин дөң-тусинь бас темдглхмн.
Хургин ашар Һәрән Бадмин төсвиг цугтан дөңнәд, өдгә цагт ирлцңгү бәрмт цаасн белдгдҗәнә. Тиим кевәр ик хургин йовудт тохма малын керг шинҗллһнә номин Цугәрәсән күрәлңгин 50 җилин туршарт кесн-күцәснь диглгдәд, терүнәс нань цаарандан селәнә эдл-ахун халхиг делгрүллһнә туст кех көдлмш батлгдсн болдг.
Келхәс, өдгә цагт Әрәсән Президент Владимир Путин селәнә эдл-ахун халх делгрүллһнд онц оньган тусхаҗана, тер юңгад гихлә эндрк амр биш цагт АПК-н халх хот-хоолын әәмшг уга бәәдл тогталһнд һоллгч орман эзлҗәнә. Орн-нутгин селәнә эдл-ахун арһлачнрин төлә шаңһа дем йилһгдәд, чинртә төсвс күцәлһнд туслҗана. Тер мет 2025 җиләс авн цергә шишлң керг-үүлдврин ветеранмудын төлә «Агромотиватор» нертә көтлвр сән йовудтаһар күцәгдҗәх болв.
Эн җилин хулһн сард селәнә эдл-ахун көдләчнрин сән Өдрлә йөрәсн кемд Владимир Владимирович АПК-н халхин мергҗлтнриг цаарандан дөңнәд бәәхиг келв. Өдгә цагт тосн-түләнә, көлгнә, арһлачнр кеҗ һарһдг эдл-ууш хулдлһна болн талдан халхар дөң-нөкдән күргхәр белн бәәхән медүлв. Хальмг Таңһч селәнә эдл-ахун регион болсндан шаңһа дөңнлһнә эв-арһсиг өргнәр олзлҗана, гиҗ темдглх кергтә.
КАРСАНА Евгения



















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.